Татарстанда кибетләрне талаган һәм кешеләргә һөҗүм иткән өчен 12 кеше хөкем ителәчәк

(Казан, 5 февраль, «Татар-информ», Полина Шевчук). Татарстанда кибетләргә һәм үтеп баручыларга һөҗүм иткән өчен 12 кеше хөкем ителәчәк, аларның дүртесе — балигъ булмаган бала. Бу турыда Россия Тикшерү комитетының ТР буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итә.

Тикшерү ачыклаганча, узган ел яшь кешеләр төркеме Чаллы, Мамадыш, Түбән Кама, Әлмәт һәм Бөгелмә территориясендә берничә җинаять кылган. Алар 23 кибеттән 400 мең сумлык азык-төлек алып чыккан.

Узган елның июнь аенда Чаллыда дүрт кеше, пыяланы ватып, азык-төлек кибетенә кергән. Аннан 61 мең сумлык шоколад, сагыз, алкоголь һәм тәмәке алып чыкканнар. Шулай ук аларның автошәһәр кешесенә талау нияте белән һөҗүм итүләре ачыкланган. Алар ир-атның йөзенә баллончиктан газ сиптергән, 20 мең сум акчасын алганнар һәм машина ачкычын алмакчы булганнар.

Яшь кешеләрнең 29 җинаятьчел очракка катнашы булуы ачыкланган. Өстәвенә, җинаять кылынган вакытта 12 шикләнелгән затның алтысы балигъ булмаган.

Хәзер җинаять эшләре берьюлы берничә маддә буенча судка тапшырылган.