Миңнеханов Матыцинга «Спорт — тормыш нормасы» проектын гамәлгә ашыру турында сөйләде
(Казан, 5 февраль, «Татар-информ»). Бүген Мәскәүдә Татарстан Президенты Рөстәм Миңнеханов Россия спорт министры Олег Матыцин белән очрашты. Бу турыла РФ Спорт министрлыгы матбугат хезмәте хәбәр итә.
Спорт министрлыгында узган очрашуда ТР Президенты ведомствоның яңа җитәкчесен вазифасына билгеләнүе белән котлады һәм һөнәри осталык, белем һәм тәҗрибә яңа вазифада зур уңышларга ирешүдә ярдәм итәчәгенә ышаныч белдерде.
Аерым алганда, Миңнеханов министрга «Казанда Спортның пляж төрләре үзәген, боз сараен һәм җиңел атлетика манежын төзү» планнары турында сөйләде, диелгән министрлыкның матбугат хезмәте хәбәрендә.
Моннан тыш, Татарстан Президенты һәм Россия спорт министры республикада «Спорт — тормыш нормасы» федераль проектының гамәлгә ашырылуы турында фикер алышты. 2019 елда физкультура һәм спорт белән шөгыльләнүче татарстанлылар саны 3 процентка артты һәм 49,5 процентка җитте.
Миңнеханов сүзләренчә, мондый нәтиҗәгә ирешүгә «Спорт — яшәү нормасы» проектын дәвам итү мөмкинлеге бирде. Төбәкнең барлык муниципалитетларында ГТО нормативларын үтәү өчен мәйданчыклар җиһазландырылачак. Быел шундый тугыз мәйдначык җиһазланачак. Шулай ук Чаллыда бассейн төзү тәмамланып килә, кайбер башка зур спорт объектлары төзелә.
«Спорт — тормыш нормасы» федераль проекты «Демография» илкүләм проектының бер өлеше булып тора. Россиядә илкүләм проектлар 2019 ел башыннан РФ Президенты Владимир Путинның 2018 елның 7 маендагы указы нигезендә гамәлгә ашырыла.
Моннан тыш, Рөстәм Миңнеханов һәм Олег Матыцин Татарстан территориясендә 2020 елда зур спорт чараларын үткәрүгә әзерлек турында фикер алышты. Бу, аерым алганда, Казанда 20-27 августта узачак БДБ илләре I уеннарының зур эшлекле программасын үз эченә алган. Шулай ук ТР башкаласында Яшьләр көнендә узачак урам экстремаль спорт төрләре фестивале һәм спорт төрләре буенча дөнья кубоклары һәм Россия чемпионатлары этаплары турында сүз барды.
«Татар-информ» мәгълүмат агентлыгы хәбәр иткәнчә, Мәскәүгә эш сәфәре барышында ТР Президенты Рөстәм Миңнеханов Россия Футбол берлеге башлыгы Александр Дюков белән Татарстанда футбол үсеше турында сөйләште.