Евробиримдик Орусиянын ГРУсунун башчыларына санкция салды
Алар Британия орусиялык мурдагы тыңчы Сергей Скрипалды жана анын кызын бул өлкөнүн аймагында ууландырууга тиешеси бар деп шек санагандар.
Натыйжада Евробиримдик санкциясы Орусиянын аскерий чалгын кызматы - ГРУнун башчысы Игорь Костюковго, анын биринчи орун басары Владимир Алексеевге, ошондой эле Британия Скрипалдарды ууландырууга тикелей катышы бар деп санаган эки агентке каршы киргизилди.
Ал эки агент Британияга Александр Петров жана Руслан Бошировдун ысымына жазылган паспорт менен барышкан.
Бирок Bellingcat иликтөө уюму аларды Александр Мишкин жана Анатолий Чепига деп аныктап, ГРУга байланышы бардыгын көргөзгөн далилдерди жарыялаган.
Алар Солсбери шаарында болгонун моюнга алышканы менен ГРУда иштешерин жана Скрипалдарды ууландырууга тиешеси бардыгын четке кагышкан.
Кремлдин басма сөз катчысы Дмитрий Песков Евробиримдик киргизген жаңы санкциялар анчалык маанилүү эместигин жана Британия Мишкин менен Чепиганын кол салууга тиешеси бардыгын көргөзгөн далилдерди бербегенин белгиледи.
Сергей Скрипаль жана анын кызы Юлия былтыр март айында Британиянын Солсбери шаарында Советтер Союзунун убагында чыгарылган "Новичок" химиялык заты менен ууландырылганы аныкталган.
Скрипалдар ууландырылгандан кийин ооруканада бир нече апта жатып чыгышкан.
Алар ууландырылган "Новичок" затына былтыр июнь айында башка эки британ жараны да кабылып, бири ооруканада көз жумган.
Скрипалдардын окуясынан кийин Британия химиялык курал боюнча эл аралык чектөөлөрдү күчөтүү багытында аракет көрүп, Химиялык куралга тыюу салуу боюнча эл аралык уюмдун ыйгарым укуктары кеңейтилишине жетишкен.
Британия жана анын өнөктөштөрү ууландыруунун артында турганы үчүн Орусия бийлигин күнөөлөгөн, Москва айыптоолорду четке каккан. Ууландыруу окуясына байланыштуу АКШ былтыр Орусияга каршы экономикалык санкцияларды киргизген. (UE)