د میدان وردګ د نن سهار په برید کې لسګونه کسان وژل شوي
روېټرز خبري اژانس د افغانستان د دفاع وزارت د سرچینو په حواله ویلي چې په دې پېښه کې ۱۲۶ تنه وژل شوي، خو ځیني امنیتي او د وردګو سیمه ییزو چارواکو ازادي راډیو ته د ۲۰ کسانو وژنه او د دېرشو تنو ټپي کېدل منلي دي.
راپورونه وایي، دوه تنه برید کوونکي وروسته قطعې ته ننوتي او مخکې تر دې چې ووژل شي، پر افغان ځواکونو یې ډزې کړي دي.
افغان چارواکي وایي، برید د دوشنبې په سهار داسې مهال پیل شو چې وسله والو برید ګرو په میدان وردګ ولایت کې د ملي امنیت پر ځانګړې قطعې د هاموی ټانک په واسطه چاودنه وکړه.
وسله والو طالبانو د برید مسؤلیت په غاړه اخیستی دی.
د میدان وردګ امنیه قوماندان ازادي راډیو ته ویلي چې تر دې چاودنې وروسته امنیتي مسؤلینو د دوهمې موټربم چاودنې مخه نیولې ده.
ولسمشرۍ ماڼۍ د اعلامیې په خپرولو سره دا برید په کلکه غندلی دی.
افغان ولسمشر اشرف غني پدې اعلامیې کې د قربانیانو له کورنیو سره خواخوږي ښودلې او هم د پیښي د څیړني سپارښتنه کړې ده.
د ارګ اعلامیه زیاتوي چې تروریستي ډلي او بهرني پلویان یې په دې ډول بریدونو د افغان امنیتي ځواکونو مورال نشي کمزوری کولی .