Ճապոնիան պատրաստ է Ռուսաստանի հետ համերաշխության պայմանագիր կնքել. Kyodo
Ճապոնիայի վարչապետի աշխատակազմը համարում է, որ երկու մյուս կղզիների՝ Իտուրուպի և Կունաշիրի վերադարձն այսօր իրական չէ։
Այս չորս կղզիները Խորհրդային Միությանն են անցել Երկրորդ համաշխարհային պատերազմից հետո, սակայն Տոկիոն հրաժարվել է դե յուրե ճանաչել այն և մինչ օրս չի ստորագրել համերաշխության մասին պայմանագիրը Ռուսաստանի հետ։
1956 թվականին Խորհրդային Միությունն ու Ճապոնիան հռչակագիր էին ստորագրել, որում ասված էր, որ Խորհրդային Միությունը պատրաստ է Ճապոնիային վերադարձնել Շիկոտանն ու Հոբաման, եթե ստորագրվի համերաշխության մասին պայմանագիր երկու երկրների միջև։
Ավելի վաղ ռուսական մամուլը գրել էր, որ Մոսկվան համաձայն է վերադարձնել այս երկու կղզիները, եթե Ճապոնիան խոստանա, որ այնտեղ չեն լինի ամերիկյան ռազմական բազաներ։
Հունվարի 14-ին, սակայն, Ռուսաստանի արտգործնախարար Սերգեյ Լավրովը Մոսկվայում հանդիպել էր իր ճապոնացի գործընկերոջ հետ և բանակցություններից հետո հայտարարել, թե երկու երկրների միջև այս հարցով լուրջ տարաձայնություններ դեռ կան։
Մի քանի օր անց ճապոնական կողմը հայտարարում էր, որ հունվարի 22-ին Մոսկվա է ժամանելու Ճապոնիայի վարչապետը, Կուրիլյան կղզիների և համերաշխության մասին պայմանագրի հարցը լինելու է երկու երկրների ղեկավարների բանակցությունների օրակարգում։
Ռուսաստանցի փորձագետները համարում են, որ եթե այս անգամ էլ պաշտոնական Մոսկվան և Տոկիոն չկարողանան պայմանավորվել խնդիրը նորից երկար տարիներ կմնա չլուծված։
Կիրակի օրը Մոսկվայում Սուվորովի անվան հրապարակում հանրահավաք է տեղի ունեցել. Ռուսաստանի ձախ ուժերը բողոքում էին Կուրիլյան կղզիները հանձնելու՝ Ռուսաստանի իշխանությունների մտադրության դեմ։ Հանրահավաքին շուրջ 1000 մարդ է եղել, լուրջ միջադեպեր չեն գրանցվել։