Փենսը հայտարարել է, որ ԱՄՆ-ը մեծ հաջողության է հասել ԻՊ-ի դեմ պայքարում
Միացյալ Նահանգները մեծ հաջողության է հասել «Իսլամական պետություն» ահաբեկչական խմբավորման դեմ պայքարում և վճռականորեն է տրամադրված այն աշխարհի երեսից ջնջելու հարցում: Այս մասին Fox News հեռուստաալիքի եթերում հայտարարել է ԱՄՆ փոխնախագահ Մայք Փենսը:
Հարցին, թե կարելի է արդյոք նախագահ Դոնալդ Թրամփի հայտարարությունները ԻՊ-ի նկատմամբ տարած հաղթանակի մասին արդարացված համարել սիրիական Մանբիջում տեղի ունեցած հարձակման հետևանքով ամերիկացի զինծառայողների մահից հետո, Փենսը պատասխանել է. «ԻՊ-ի դեմ պայքարում ունեցած առաջընթացը, որը մենք գրանցել ենք Թրամփի նախագահության սկզբից, բացառիկ է: Այն բանից հետո, ինչ 2011 թվականին նախագահ Օբաման դուրս բերեց ամերիկյան զորքերն Իրաքից, մենք «ԻՊ-ի խալիֆայության» վերելքի ու Սիրիայի և Իրաքի տարածքում դրա տարածման ականատեսը դարձանք: Երկու տարի անց Օբաման սկսեց ռմբակոծությունների արշավը, սակայն հենց նախագահ Թրամփը փոխեց հակառակորդի հետ պայքարի կանոնները»:
«Նախագահը ցանկանում է տուն վերադարձնել մեր զորքերը: Մենք ընդունում ենք, որ տարածաշրջանում դեռ կան գրոհայիններ, սակայն մենք հետ ենք գրավել ԻՊ-ի գրաված տարածքների 99%-ը: Իրականում «Իսլամական պետությունը» պարտված է, և մենք չենք հանգստանա, մինչև դուրս չմղենք այն տարածաշրջանից և չվերացնենք երկրի երեսից», - հավելել է Փենսը:
Հիշեցնենք, որ չորեքշաբթի՝ հունվարի 16-ին, սիրիական Մանբիջ քաղաքում տեղի է ունեցել պայթյուն, որի հետևանքով զոհվել է 27 մարդ, այդ թվում՝ չորս ամերիկացի զինվորական: Պայթյունի պատասխանատվությունը ստանձնել է «Իսլամական պետություն» ահաբեկչական խմբավորումը: