Ўзбекистон ва Португалия Профессионал футбол лигалари ҳамкорликда ишлайди
Ўзбекистон Профессионал футбол лигаси 2019 йилги мавсум учун талабларни кучайтираётгани қайд этилганди. Яъни, келаси йилдан бошлаб Суперлиганинг ҳар бир клуби ўз академияси масаласига жиддий эътибор қаратиши шарт.
Бу борада ташкилот футбол академиялари ривожланган мамлакатлар билан алоқалар ўрнатишда давом этмоқда. Яқиндагина Ўзбекистон ва Португалия Профессионал футбол лигалари ўзаро ҳамкорлик борасида келишувга эришганди. Мазкур иш юзасидан ПФЛ Халқаро алоқалар бўлими вакили Зоҳид Акрамовни Порту шаҳрига жўнатди.
Кеча — 23 июль куни ПФЛ вакили аввалдан белгиланган учрашувга кўра Португалия Профессионал футбол лигаси ижрочи директори Сониа Карнейру ҳамда Юридик масалалар бўйича ижрочи директор Жаоу Мартинс билан кўришди. Эндиликда Португалия Профессионал футбол лигаси маркетинг, медиа, клублар билан ишлаш, трансляция ва бошқа турли масалалар бўйича ўз мутахассисларини Ўзбекистонга юбориб, семинарлар ташкил қилиш ва ўз тажрибаси билан ўртоқлашишга тайёр.
Қўшимчасига, “Порту” футбол клуби академияси билан ҳам ҳамкорлик қилиш бўйича келишиб олинди. Dragon Force номи билан машҳур академия мураббийлари сентябрь–октябрь ойларида Ўзбекистонга ташриф буюриб, ёш футболчиларга “Порту” методикаси асосида футбол сирларини ўргатади.
Маълумот учун, яқиндагина ЎФА биринчи вице-президенти Умид Аҳмаджоновнинг имзоси билан Суперлига клубларига янги штат жадваллари тақдим этилган бўлиб, унда футбол академияси масаласи алоҳида ўрин тутганди. 2019 йилдан бошлаб барча клублар ўз академиясини йўлга қўйишга эътибор қаратади.
Манба: pfl.uz