Дамир Шәйхетдинов авылдашларына Яңа ел бүләге ясады
Түбән Әлкидә яшәүче эшмәкәр Дамир Шәйхетдинов авыл мәдәният йортына радиоаппаратура алып бирде.
Эшмәкәрнең авылдашларын кайгыртып эшләгән бу гамәле беренчесе түгел. Авыл сабантуенда тальян моңы яңгырасын әле дип, грамунчы Рифкать Хәмәтшинга гармун бүләк иткән ул. Клуб мөдире Рәмзия Галәветдинова эшмәкәргә рәхмәт әйтеп бетерә алмый, чөнки һәр кичә, һәр бәйрәмне үткәргәндә Шәйхетдиновлар ярдәменә таяна. Һәм менә бу юлы да 100 мең сумлык аппаратура алып биреп, Дамир әфәнде авылдашларына Яңа ел алдыннан зур бүләк ясады.