Балык Бистәсе районында янгын куркынычсызлыгы таләпләренең үтәлеше тикшерелә

–Тиешле таләпләр үтәлмәсә, газ белән җылыту приборлары зур куркыныч тудыралар. Газ белән шаяру  фаҗигаләргә илтәргә мөмкин,–ди дәүләт янгын күзәтчелегенең баш белгече Андрей Мишин. –2012 елның февраль аенда Трой-Урай авылында газ ягулыгы белән эшли торган кулдан ясалган мунча миченнән янгын чыкты. Мәктәп укучыларының күреп калуы нәтиҗәсендә генә торак йорт уттан сакланып калды.

Район газ службасыннан алынган мәгълүматләр буенча районның бары тик 4 торак пунктында- Гобәй, Кадрәк авылларында, Яңа Солтан, Камский поселокларында газ плитәләрен баллонлы газ белән ягу буенча хезмәт күрсәтелә. Башка торак пунктларда көнкүреш газ баллоннарын куллану кагыйдә бозу булып санала.

Газ хуҗалыгындагы кайбер куркынычсызлык кагыйдәләрен искә төшереп үтү урынлы булыр.

Көнкүреш газ баллоннарын торак йортларда, фатираларда, тулай торак бүлмәләрендә, сарай, гараж, мунчада, балконнарда, ишек алдындагы ачык мәйданчыкларда саклау тыела. Газ баллоннары янмый торган ящикларда, бинага керү урыныннан кимендә 5 метр ераклыкта сакланырга тиеш. Ящикның кояш нурларыннан сакланган, җилләтүле булуы зарур. “Огнеопасно”, “Газ баллоны” дигән кисәтү язулары да булу шарт. Газ баллоннарына вакытында сынау уздырылырга тиеш. Сроклары баллонда күрсәтелә. Эретеп ябыштыру эшләре башкарганда горелка белән газ баллоны арасында–10 метр, газ һәм кислород баллоннары арасында кимендә 5 метр ара булырга тиеш. Газ белән эретеп ябыштыру эшләре башкарганда наряд рәсмиләштерергә, янгын сүндерү чаралары булдырырга кирәк. Газ баллонына тоташтырылган шлангларда бары тик заводта ясалган хомутлар гына файдалану рөхсәт ителә. Газ һәм кислород баллоннарын бергә саклау тыела.

Бу таләпләрне үтәмәүчеләргә карата штраф санкцияләре кулланыла. Ә кирәк булмаган газ баллоннарын утильләштерү таләп ителә.

Илгиз Җамалиев язып алды.

Фотосы: www.haber10.com