«Ничек шулай булган?»: Башкортстанда бер хатын-кыз хастаханәдән чыккач вафат булган
Башкортстанда бер гаилә әниләренең үлемен тикшерүне таләп итә – хатын-кыз хастаханәдән чыгып 2 көн узгач вафат булган. Мөрәҗәгатьне республика җитәкчесе аккаунтына язганнар. Снежана Лихачева сүзләренчә, әнисе 21 гыйнварда хастаханәдән чыккан, үзен яхшы хис иткән. Ләкин 23 гыйнварда кан китүдән вафат булган. Бу хакта «Мой Башкортостан» сайты яза.
«Аны ничек чыгарганнар һәм ничек караганнар! Йөрәктән дәвалаганнар. Тамара Георгиевнаның ире тикшерү комитетына гариза язачак», – дигән Снежана Лихачева.
Башкортстанның Сәламәтлек саклау министрлыгында да бу хәлгә аңлатма биргәннәр. Анда әйтүләренчә, хәзер хастаханәдә тикшерү башланган. Аның нәтиҗәләрен вафат булган хатынның туганнарына хәбәр итәчәкләр.