Чаткалдагы нааразылык акциясында үч киши жабыркады
- Уу калдыктарын сактоочу жайлардын курулушуна нааразылык көп жылдан бери эле келатат. Окуя өөрчүп кетпесин деп бул жакка Жалал-Абаддан атайын даярдыктагы отряддын балдарын алып келип көзөмөлдөтүп коюшкан. Эки күн мурда жергиликтүү бир тургундун бирөө жылкысын айдап келейин деп ошол жакка өтөйүн десе, ал жакка өткөрбөй койгон. Ал жер өзү жайыт, жайытка шлагбаум коюп алышкан. Ошол жерде чыр чыгып, жергиликтүү тургунду уруп коюшкан. Ага нааразы болгон тургундар, көбүнчө жаштар көтөрүлгөн. Ал жерде элден качып баратканда бир аскер бутун сындырып, бирөө башынан жараат алыптыр.
Чаткалда кен иштетүүчү компаниялардын ишине нааразылык бир топ жылдан бери көтөрүлүп келет. Буга чейин алар мамлекет башчы Сооронбай Жээнбековго, парламентке, өкмөткө кайрылуу жиберип, Ала-Бука, Чаткал аймагындагы алтын казуучу компаниялардын ишин мамлекеттик деңгээлде текшерүү боюнча демилге көтөрүлгөн. Анда Чаткалдын Терек-Сай аймагына түркиялык "Эти Бакыр" жана "Голден Винге" компаниялары цианид колдонуу менен алтын чайкоочу фабрикаларды кура баштаганы көрсөтүлгөн. Чаткал районунун акими Канжарбек Эшалиев эки фабрика курула турганын ырастап, бирок алар экологиялык эрежелерди сактоого кепилдик бергенин айткан болчу.
Аким учурда абал туруктуу экенин “Азаттыкка” кабарлады. Милиция азырынча жооп бере элек. (КЕ)