Ульяновск өлкәсендә пассажир поезды вагоннары рельслардан чыккан
Ульяновск өлкәсендә пассажир поезды вагоннары рельслардан чыккач, кимендә 7 кеше зыян күргән. Мәгълүматлар ачыклана, дип хәбәр иткән «РИА Новости»га Ульяновск катастрофалар медицинасы үзәге вәкиле.
«Якынча белешмә буенча 7 кеше зыян күргән, шуларның берсе — бала», — дигән үзәк вәкиле.
Бүген иртән Ульяновск өлкәсендә Бряндино станциясе янында җиде пассажир вагоны рельслардан чыккан. ТАСС мәгълүматлары буенча, вагоннар янтайган, кешеләр тәрәзәләр аша чыккан. Оператив мәгълүматларга караганда, поезд составында 8 вагон булган, аларда 415 пассажир барган.
Урынга Ульяновск, Бөгелмә, Сызрань һәм Рузаевка станцияләреннән торгызу поездлары җибәрелгән, Гадәттән тыш хәлләр министрлыгы хезмәткәрләре килгән. Зыян күрүчеләр һәм һәлакәт сәбәпләре турында мәгълүматлар ачыклана, дип яза «Татар-информ».