Аҕа – ыал акылаата, уол – ыал кэскилэ
«Аҕа – ыал акылаата, уол – ыал кэскилэ» диэн Саха Өрөспүүбүлүкэтигэр Аҕалар уонна уолаттар күннэригэр аналлаах тэрээһин оҕо кинигэтин нэдиэлэтин чэрчитинэн Сунтаар нэһилиэгин бибилэтиэкэтигэр буолла. Манна нэһилиэк түөрт актыыбынай аҕата алта сэргэх уолаттарынаан кэлэн хоһоон куонкуруһугар кытыннылар. Тэрээһиҥҥэ бырааттыы Вениамин Данилов уонна Тимур Николаев Ленинград блокадатын туһунан мини испэктээктээх туруоран хоһоон ааҕаннар «Бастыҥ ааҕааччылар» ааты ыллылар. Сергей Егорович, Уйгун Потаповтар «Эрчимнээх ааҕааччылар», Денис Трофимович, Артем Павловтар «Хомоҕой ааҕааччылар», Федор Николаевич, Станислав Авеловтар «Дьулуурдаах ааҕааччылар», Дмитрий Николаевич, Рафаэль Ивановтар «Уус-уран ааҕааччылар» номинациялары ыллылар.
Дмитрий Иванов уһун олоҥхону өйтөн ааҕан дьон биһирэбилин ылла. Оттон уола Рафаэль Арассыыйа Аармыйатыгар хантараагынан сулууспалыы сылдьан, уоппускатыгар кэлээт таптыыр бибилэтиэкэтигэр кэлбитэ, аҕатынаан күрэскэ кыттыбыта оҕо сааһыттан билэр бибилэтиэкэрдэрин олус үөртэ, долгутта. Манна даҕатан эттэххэ, Дмитрий Иванов оҕолорун олох кыра эрдэхтэриттэн бибилэтиэкэҕэ сырытыннартаабыт аҕалартан биир бастыҥнара.
Федор Авелов РТС түөлбэтин диэки бибилэтиэкэ суоҕа олус куһаҕанын, олохтоохтор, оҕолор сайдалларыгар, олоҕу кытары сэргэ хаамсалларыгар кэккэ ыарахаттары көрсөллөрүн туһунан санаатын үллэһиннэ.
Кыттыбыт аҕалар, уолаттар хаһан баҕарар Сунтаар нэһилиэгин бибилэтиэкэтигэр кэлэн ааҕар саалаттан таптаабыт кинигэлэрин, сурунаалларын, хаһыаттарын босхо уларсан ааҕар быраабы ыллылар.