МАЬНЕЛИ КЕЛИСУЬВ ТУЬЗИЛГЕН
Он етинши июньде Петербург каласында озган Халклар ара экономикалык форумнынъ майданында Керуьв-Кавказдынъ ислери бойынша РФ министрининъ биринши орынбасары, «Керуьв-Кавказды оьрлендируьв корпорациясы» акционерлик ямагатшылыгынынъ директорлар Советининъ председатели Одес Байсултанов Кавминводы юртында инновациялык медициналык кластердинъ проектин яшавга эндируьв бойынша итальян компаниялары ман келисуьвге кол баскан. Маьнели маглуматларга кол басувда Россия Федерациясынынъ вице-премьери Александр Хлопонин, Керуьв-Кавказдынъ ислери бойынша РФ министри Лев Кузнецов, Карашай-Шеркеш Республикасынынъ Басшысынынъ борышларын заманлыша толтырувшы Рашид Темрезов, Ингуш Республикасынынъ Басшысы ЮнусБек Евкуров, Керуьв Осетия-Аланиядынъ етекшиси Вячеслав Битаров катнастылар.
Сол ок куьн Лев Кузнецов эм Одес Байсултанов СКФО субъектлерининъ етекшилерине эм элшилерине Кавминводы юртында уйгынланаяк инновациялык медициналык кластердинъ концепциясын анълатканлар, бу проектти яшавга таралтув кыралымызга эм регионга кайдай пайдалыкларды аькелееги акында хабарлаганлар.
Белгилеп озбага тийисли, Кавминводыдынъ, сонынъ санында КЧР-дынъ юртларындагы 200 гектар майданда 576 орынга карарланган медициналык университет, сменада 900 йоклавга карарланган клиника, илми-тергев орталык курылаяклар. Оннан баска болып, бу ерде туьрли йоьнелисли уьш клиника, социаллык инфратуьзилистинъ объектлери, технопарк, СКФО субъектлеринде санатор-курортлык реабилитациялавдынъ орталыклары ашылаяклар. Баьри объектлер де соьлеги заманнынъ талапларына яваплайтаган медициналык алатлар ман аьжетсизленееклер. Энъ ийгиси, медициналык кластер МинВоды аэропортыннан узак болмаган ерде ерлесеек. Россия Федерациясынынъ гражданларын медициналык канагатлав парызлы медициналык кавыфсызландырувдынъ полиси аркалы бажарылаяк, деп ойланылады.
«Сосы маьнели инновациялык проектти яшавга эндируьв Россия Федерациясынынъ юртында медициналык туризмди оьрлендирмеге амал береек», – деп айтып озды пресс-конференцияда Керуьв-Кавказдынъ ислери бойынша РФ министрининъ биринши орынбасары Одес Байсултанов.
Петербургтынъ Халклар ара экономикалык форумында РФ Президенти Владимир Путин де соьйледи. Сол пленарлык йыйылыста КЧР етекшиси Рашид Темрезов катнасты.