САНКТ-ПЕТЕРБУРГ ЙРЫЦЫНХУШТІ
Санкт-Петербург апны КЧР аунашвачпагІв ТЕМРЕЗОВ Рашиди а-Президент библиотека агенеральна директор ВЕРШИНИН Александри ранйара акІвшатІ. Ауи йалан КЧР а-Парламент а-Председатель ИВАНОВ Александр, культурала КЧР аминистр ГВАГВ Мадина.
Анйара апны а-Президент библиотеки Къарча-Черкеси рацынхарала ангІалра мачвы ацІарцІатІ.
Темрезов Рашид йшгІаликІгІазла, ангІалра хІреспублика абзазагІвчва а-Президент библиотека апны архив швъаква, апхъанчІви книгаква электронна амальла тшрыхадыргІвазарныс, уагІа щарда злу авидеоконференцияква акІвдыршарныс, акультура проектква абзазара йаларжьырныс, ашвапхаква амырдарныс рылнаршуштІ.
А-Президент библиотеки Къарча-Черкеси апхъалагьи ацынхара рызбжьан. ХІреспублика акультура йгьи арыпхьара нхартаква абиблиотека апны йакІвшауа аконференцияква йызнымкІва йдрайгватІ, сынчІва май агІан Лагъь-КІавкІаз къральыгІва гуманитар-технология академия йшрыцынхушла ангІалра мачвы ацІарцІатІ.
А-Президент библиотека аунашвачпагІв Вершинин Александр йшихІвазла, мачвы зцІарцІаз ангІалра амагІны дупІ. Асквш 2016 ацІыхъва Россия ашІыпІа 85 зланакІуа йазакІу сеть гІандыршуштІ. Абиблиотека ангІахъыртІуаз ауи апш хачІвы лихтІ РФ а-Президент Путин Владимир. УахьчІвала шта 79 рпны а-Президент библиотека апны йщтІу агІвыраква тшрыхаргІвазара уылзыршауа квтата 200 нхитІ.
Санкт-Петербург апны а-Президент библиотека асквш 2009 агІан йгІахъыртІытІ. УахьчІвала ауаъа йщтІу ашвъаква, акнигаква зыкь 450 йайхІапІ, ауат йрылапІ Къарча-Черкес атурых узырдыруагьи. ХІреспублика йазалху «Карачаево-Черкесская Республика: страницы истории» портал апны архив швъаква, асуратква датшагьи уауаштІ.