Ўзбекистон ТИВ ватандошларни COVID-19’га қарши Хитойда янги қоидалар жорий қилинганидан огоҳлантирди
Пекинга келадиганларнинг карантин муддати 28 кунгача узайтирилди. Бошқа шаҳарлар орқали у ерга келинганида, яна 7 кун кузатувга олинади.
Ташқи ишлар вазирлиги Хитойнинг турли ҳудудларида, жумладан, Пекин шаҳри аҳолиси ўртасида COVID-19 коронавирус инфекцияси билан касалланишнинг янги ҳолатлари рўй бергани муносабати билан Хитойда бўлиб турган ва мазкур мамлакатга келишни режалаштираётган ватандошларни огоҳлантирди.
2021 йил 19 январдан хорижий мамлакатлардан пойтахт Пекинга келадиганлар соғлиғини назоратга олиш учун карантин муддати 28 кунгача узайтирилди.
Хориждан Хитойнинг бошқа шаҳарлари орқали Пекинга кирмоқчи бўлганлар пойтахтга киришдан олдин ўша шаҳарларда 21 кун карантинда бўлади. Пекинга етиб келгач, уларнинг саломатлиги 7 кун давомида яна кузатувга олинади.
Хитойдан Ўзбекистонга қайтмоқчи бўлган ватандошлар "Сиан Тошкент - Сиан" йўналишида чартер ҳаво қатновларини амалга ошираётган Хитой авиакомпанияси хизматларидан фойдаланиш тавсия қилинган. Талабалик гувоҳномасини тақдим этган талабалар учун авиачипта харид қилишда чегирма мавжуд.
Ўзбекистон фуқаролари шунингдек, ХХРдан Сеул шаҳрига (Корея Республикаси) етиб олиши ва аэропортнинг транзит ҳудудидан чиқмаган ҳолда ҳафтанинг ҳар жума куни Uzbekiston Airways AЖ амалга ошираётган "Тошкент - Сеул - Тошкент" рейслар орқали Ўзбекистонга қайтишлари мумкин.
Ўзбекистонга қайтган ва ўқишни/меҳнат фаолиятини давом эттириш мақсадида Хитойга қайтишни режалаштираётган ватандошларларга таълим муассасаси/иш берувчи билан боғланиб, ўзларининг Хитойга қайтишлари бўйича маслаҳатлашиб олишлари тавсия этилмоқда.