Բյուջեն սահմանափակ է, պետք է մեր հնարավորություններն ու կարիքները համադրենք. Լևոն Ալթունյանը Ուսանողական պոլիկլինիկան լուծարման մասին
50 տոկոսով համապատասխանում է իրականությանը, 50 տոկոսով՝ ոչ: Այսպիսի պատասխան է տվել առողջապահության նախարար Լևոն Ալթունյանը «Արմենիա» հեռուստաընկերության «Ռ-էվոլյուցիա» հաղորդման եթերում հնչող այն հարցին, թե արդյոք ճի՞շտ են այն խոսակցությունները, թե Ուսանողական պոլիկլինիկայի լուծարման պատճառն այն է, որ նախարարն ուզում է զարգացնել իր անձնական «Վարդանանց» բ/կ-ի բիզնեսը:
«Նախարարությունն առաջարկել է լուծարել Ուսանողական պոլիկլինիկան օպտիմիզացիայի, բարեփոխումների մի բաղադրիչի սահմաններում: Առողջապահության բյուջեն սահմանափակ է, և մենք պետք է մեր հնարավորություններն ու կարիքներն իրար հետ համադրենք»,-ասել է նախարարը:
Անդրադառնալով այն հարցին, թե ինչու առաջինն օպտիմիզացիայի տակ ընկավ Ուսանողական պոլիկլինիկան՝ Լևոն Ալթունյանը պարզաբանել է, որ Հայաստանի առողջապահությունն առաջնային օղակում աշխատում է կցագրման սկզբունքով: Այսինքն՝ Հայաստանի յուրաքանչյուր բնակիչ կցագրվում է ինչ-որ առաջնային օղակի՝ պոլիկլինիկայի, և պոլիկլինիկան այդ անձի համար տարեկան մոտ 6 հազար դրամ սպասարկման գումար է ստանում պետությունից:
«Ինչ ունենք ուսանողների դեպքում: 6 հազար դրամ ստանում է նրա տարածքային պոլիկլինիկան, ԲՈւՀ ընդունվելուց հետո 6 հազար դրամ էլ սկսում է ստանալ Ուսանողական պոլիկլինիկան: Այսինքն՝ ուսանողների համար, որոնք շատ հազվադեպ են դիմում Ուսանողական պոլիկլինիկա, բյուջեից դուրս են գրվում կրկնակի կցագրման գումարներ: Սա չի արդարացվում ոչ իրենց առողջական վիճակով, ոչ դիմելիությամբ, ոչ անհարժեշտությամբ»,-փաստել է առողջապահության նախարարը՝ նշելով, որ Ուսանողական պոլիկլինիկան այսօր սպասարկում է շուրջ 56-58 հազար ուսանողի։
Այս տրամաբանությունից է բխել, ըստ Լևոն Ալթունյանի, Ուսանողական պոլիկլինիկան փակելու որոշումը:
Թե ինչպես են բաշխվելու գումարները պոլիկլինիկան փակելուց հետո, Լևոն Ալթունյանը բացատրել է. «Ենթադրենք 56 հազար ուսանող ունենք, նրանց մոտավորապես կեսը՝ 28 հազարը Երևանի բնակիչներ են: Իրենք ունեն իրենց տարածքային պոլիկլինիկաները, որտեղ կցագրված են: Մարզերի ուսանողները, որ սովորում են Երևանում և բուժում էին ստանում Ուսանողական պոլիկլինիկայում, կկցագրվեն ԲՈւՀ-ին ամենամոտը գտնվող երկու-երեք պոլիկլինիկաներին՝ համամասնության սկզբունքով, եթե նշված «Վարդանանց» բուժհաստատությունը գտնվի այդ 2-3 պոլիկլինիկաների շարքում, ապա այն կստանա համամասնորեն ուսանողների քանակ»:
Նախարարը նշել է, որ ընթացակարգը կլինի հետևյալ կերպ՝ ուսանողը ԲՈւՀ ընդունվելիս կլրացնի համապատասխան հարցաթերթիկ, անկետա և միանգամից, իր նախընտրանքով կկցագրվի մոտակա 2-3 պոլիկլինիկաներից մեկին: