Այն մարդիկ, որ կանխատեսել են իմ մեկնելը Հայաստանից կամ քաղաքականությունից, շտապում են. Րաֆֆի Հովհաննիսյան
Պայքարը շարունակվում է, «Ժառանգություն»-ը երկար տարիներ եղել է և՛ խորհրդարանում, և՛ խորհրդարանից դուրս: Նման հայտարարություն է արել «Ժառանգություն» կուսակցության ղեկավար Րաֆֆի Հովհաննիսյանն «Ազատություն» ռադիոկայանի «Կիրակնօրյա վերլուծական Թամրազյանի հետ» հաղորդման եթերում:
«Մեզ համար ժողովրդի իրավունքների համար պայքարը, ազգային շահի ու անկախ, ինքնիշխան պետության համար պայքարը մնում են օրակարգային, և այդպես պիտի շարունակենք»,-ծրագրերի մասին տեղեկացրել է Րաֆֆի Հովհաննիսյանը:
Նրա գնահատմամբ՝ ընտրակեղծարարությունը համատարած էր, իրենց քվեները շատ ավելին կլինեին, ըստ նրա՝ հաստատ այդ նվազագույն շեմը կհաղթահարեին:
«Հայաստանի քաղաքական պրոցեսները, նաև ընտրակեղծարարության մեխանիկան 25 տարում պրոգրես է ունեցել բացասական իմաստով: Ամեն դեպքում, «ՕՐՕ» դաշինքը պետք է անցներ: Այլ հարց է, թե մարտավարական, քարոզչական, քաղաքական ինչ խնդիրներ կային, որ պետք է ավելի լավ արվեին»,-ասել է «Ժառանգության» ղեկավարը:
Անդրադառնալով «Ելք» դաշինքի այն հայտարարությանը, որ քաղաքացիները վերցրել են ընտրակաշառք, քվեախցիկում իրենց քվեն տվել են «Հանրապետական»-ին, Րաֆֆի Հովհաննիսյանն ասել է. «Ես չգիտեմ՝ գործընկեր դաշինքը նույն բանը կասե՞ր, եթե չհաղթահարեր անցողիկ շեմը, նման բան ասում են, երբ որ անցնում են: Երբ նախորդ ընտրություններին մենք մասնակցում և անցնում էինք, այդ դաշինքի լիդերներից կոչ էին անում վայր դնել մանդատները։ Մենք նման կոչով հանդես չենք գալիս: Եղավ, ինչ եղավ, հաջողություն ենք մաղթում իրենց»:
Զարուհի Փոստանջյանի այն պնդմանն ի պատասխան, որ նախկին պաշտոնյաների հետ համագործակցությունը չի կարող բերել հաջողություն, «Ժառանգության» ղեկավարը նշել է, որ ինքն էլ է մի տարի պաշտոնյա եղել: Նրա խոսքով՝ պաշտոնյան նույնպես քաղաքացի է, ինքն էլ իրավունք ունի մասնակցել քաղաքական կյանքին և ուղղել իր սխալները, եթե սխալներ է ունեցել:
«Պետք չէ ամեն մեկի նկատմամբ դատավորի դիրքերից հանդես գալ: Ես էլ ունեցել եմ տարաձայնություններ թե՛ գեներալ Օհանյանի, թե՛ պարոն Օսկանյանի հետ, բայց մեր կուսակցությունը համարեց, որ ոչ թե 4-5 պատգամավոր ունենալու ճամփով պետք է գնալ, այլ համալիր լուծում առաջարկել մեր ժողովրդին, և արդյունքը եղավ այն, ինչ եղավ: Այստեղ ո՛չ մեծամտանալու, ո՛չ էլ ընկճվելու խնդիր կա»,-վստահեցրել է Րաֆֆի Հովհաննիսյանը և հավելել, որ կայացած քաղաքական գործիչները պիտի կարողանան ոչ թե ածականներով խոսել, այլ պատասխանատվություն կրել:
«Այն մարդիկ, որ կանխատեսել են իմ մեկնելը Հայաստանից կամ քաղաքականությունից, շտապում են»,-տեղեկացրել է Րաֆֆի Հովհաննիսյանը: