Զարուհի Փոստանջյանի աղջիկը հոսպիտալացված է, վիճակը կայուն է․«Արմենիա» ԲԿ բժիշկ (տեսանյութ)
«Երկիր Ծիրանի» կուսակցության ղեկավար, Երևանի քաղաքապետի թեկնածու Զարուհի Փոստանջյանի աղջիկը՝ Լիլիթ Դրամփյանը, «Արմենիա» բժշկական կենտրոն է տեղափոխվել շտապօգնության բրիգադով՝ ուղեղի ցնցում հարցականով ախտորոշմամբ․այս մասին Tert.am-ին հայտնեց «Արմենիա» բ/կ-ի նեյրովիրաբուժական բաժանմունքի հերթապահող բժիշկ Արսեն Բեյբությանը:
«Գանգատներն են՝ գագաթային շրջանի ցավեր, սրտխառնոց: Այս պահին հիվանդը գտնվում է հետազոտման փուլում: Կատարված ռենտգեն հետազոտության արդյունքում ոչ մի խնդիր չի հայտնաբերվել, սակայն ունենք բազմաթիվ հետազոտություններ, որոնք առաջիկայում կատարվելու են: Հիվանդի կյանքին այս պահին սպառնացող որևէ խնդիր չի հայտնաբերվել: Հոսպիտալացված է»,- ասաց նա՝ նշելով, որ Լիլիթ Դրամփյանի վիճակը կայուն է, հետագա հետազոտություններով կհաստատվի հիմնական կլինիկական ախտորոշումը:
Բժշկի խոսքով՝ հիվանդը հաղորդակցվում է, միայն գանգատվում է սրտխառնոցից և գագաթային ցավերից: «Կան նաև արմունկի շրջանում որոշակի քերծվածքներ»,- ասաց նա:
Tert.am-ը ցանկացավ տեսանկարահանել նաև Լիլիթ Դրամփյանին: Բժիշկ Բեյբությանը տեղեկացրեց, որ կարող ենք խոսել իր՝ հիվանդի հետ խոսելուց և նրա ցանկությունն իմանալուց հետո: Բեյբությանը վերադարձավ՝ պատասխանելով, որ Լիլիթ Դրամփյանը չի ցանկանում հարցազրույց տալ և տեսանկարահանվել:
Հիշեցնենք, որ այսօր Զարուհի Փոստանջյանն Ավանում ՀՀԿ -ի շտաբներից մեկում ընտրակեղծարարության նյութերի առկայության ահազանգով էր գնացել: Փոստանջյանին և նրա դստերը ոստիկանները ցանկանում էին քաշքշելով բերման ենթարկել, սակայն Զարուհի Փոստանջյանը մեքենա չի նստել, աղջկան էլ ստիպողաբար նստեցրել են ոստիկանական մեքենան: