«Ելք»-ը նպատակ ունի խեղաթյուրելու փաստերը, պիտակավորելու ՀՀԿ քարոզչությունը. ՀՀԿ ներկայացուցիչ
Որևէ հիմք չկա «Ելք»-ի դիմումը բավարարելու համար, սա ընդամենը նպատակ ունի ապատեղեկատվություն տարածելու, խեղաթյուրելու փաստերը և պիտակավորելու ՀՀԿ-ի՝ բացառապես Ընտրական օրենսգրքով նախատեսված քարոզչության ընթացքը: ԿԸՀ արտահերթ նիստի ընթացքում հայտարարեց ՀԿԿ ներկայացուցիչ Զավեն Առաքելյանը, ով ավելի վաղ միջնորդություն էր ներկայացրել «Ելք»-ի կողմից Երևանի ավագանու ընտրություններում ՀՀԿ մասնակցությունը անվավեր ճանաչելու մասին դիմումի քննությանը: ԿԸՀ-ն բավարարել էր միջնորդության քննարկմանը:
Զավեն Առաքելյանի դիտարկմամբ՝ ԿԸՀ-ի և տարածքային ընտրական հանձնաժողովների կողմից տպագրված ոչ մի քվեաթերթիկ ՀՀԿ ոչ մի շտաբում, կամ ենթաշտաբում չկա:
«Հանրապետական կուսակցությունը Երևանու ավագանու ընտրությունների նախընտրական քարոզչության ընթացքում և այդ գործընթացի կազմակերպման ընթացքում օրենսդրությամբ սահմանված կարգով պատվիրել և տպագրել է քվեաթերթիկի նմուշ, ինչը որ հաստատվել է ԿԸՀ-ի կողմից, սակայն քվեաթերթիկի վրա հստակ նշված է, որ այն հանդիսանում է նմուշ, ակնհայտորեն գրված է նմուշ բառը, որպես սահմանված տպագրական նմուշ այն պարունակում է պատվիրատուի վերաբերյալ տվյալներ, այն կազմակերպության մասին տվյալներ, որը տպագրել է և տպաքանակի վերաբերյալ, այսինքն՝ սա ընտրական օրենսգրքով նախատեսված քարոզչական տպագիր նյութ է և, բնականաբար, ՀՀԿ-ն իր որևէ շտաբում կամ ենթաշտաբում այս նմուշից տարբերվող որևէ այլ քվեաթերթիկ չկա»,-վստահեցրեց նա:
Նա պնդեց, որ քվեաթերթիկի նմուշը օգտագործվել է որպես քարոզչական գործիք՝ ավելի արդյունավետ քարոզչություն իրականացնելու նպատակով:
Ըստ ՀՀԿ ներկայացուցչի՝ ընտրությունների ժամանակ միշտ էլ քվեաթերթիկի տպագրական քարոզչական նմուշը օգտագործվում է որպես գործիք:
Ինչ վերաբերում է ընտրակաշառքին , ապա ՀՀԿ ներկայացուցչի խոսքով՝ ՀՀԿ շտաբն արդեն հանդես է եկել համապատասխան հերքող հայտարարությամբ:
Հիշեցնենք, որ «Ելք»-ը դիմել է ԿԸՀ՝ Երևանի ավագանու առաջիկա ընտրություններին Հանրապետական կուսակցության (ՀՀԿ) գրանցումը ուժը կորցրած ճանաչելու հայցով։ Դիմումը հիմնվում է երեկ «Հայկական ժամանակ» օրաթերթի լրագրողի արձանագրածի վրա: Ըստ այդմ` Հանրապետականի քաղաքապետի թեկնածու Տարոն Մարգարյանի շտաբում, ենթադրաբար, ընտրակաշառք է բաժանվում և կան քվեաթերթիկ հիշեցնող տրցակներ: Երկրորդ դիմումով «Ելք»-ը պահանջում է, որ ԿԸՀ-ն դիմի ոստիկանություն, որպեսզի հնարավոր խախտումները բացառելու համար սահմանվի հերթապահություն ՀՀԿ-ի նախընտրական շտաբերում: Ընդդիմադիր դաշինքը պահանջում է նաև հաշվարկի ժամանակ անվավեր ճանաչել բոլոր այն քվեաթերթիկները, որոնց վրա կլինեն գունավոր գրիչներով նշումներ կամ ծրարներում հայտնաբերվեն այլ առարկաներ: