Ֆրանսիայի խորհրդարանական ընտրություններին Էմանուել Մակրոնի կուսակցության ցուցակով առաջադրվել է երեք հայ.Արման Ավագյան
Ֆրանսիայում հունիսի 16-ին կայանալիք խորհրդարանական ընտրություններին երեք ֆրանսահայ է մասնակցելու, ինչը, ըստ ֆրանսահայ հասարակական գործիչ Արման Ավագյանի, բացառիկ երևույթ է:
Երեք թեկնածուներն էլ՝ Պասկալ Շամասյանը, Գիյոմ Գասպարյանը և Դանիել Կազարյանը, Արման Ավագյանի տեղեկացմամբ՝ Ֆրանսիայի նորընտիր նախագահ Էմանուել Մակրոնի կողմից օրերս հիմնադրված «Առաջ Հանրապետություն» քաղաքական ուժի կազմում են հանդես գալու:
«Պասկալ Շամասյանի դեպքում հավանականությունը քիչ է, քանի որ այն ընտրատեղամասը, որտեղ ինքն առաջադրված է, ավանդական աջակողմյան է, այստեղ Վալերի Բուայեն բարի համբավ ունի»,- ասաց նա՝ նշելով, որ Գիյոմ Կասպարյանի դեպքում, սակայն ընտրություններում հաղթելու հավանականություն կա, Դանիել Կազարյանի դեպքում ևս շանսեր կան:
Ներկայացնելով թեկնածուներին՝ Արման Ավագյանը նշեց, որ Դանիել Կազարյանը Լիոնի հայաշատ շրջաններից մեկի՝ Դեսինի բնակիչ է, տեղի մշակույթի տան խորհրդի անդամներից է: Գիյոմ Գասպարյանն էլ տեղեկատվական տեխնոլոգիաների ոլորտից է ու Մակրոնի ղեկավարած «Առաջ» շարժման ակտիվ անդամներից է: Պասկալ Շամասյանը ֆրանսահայ միությունների գլխավոր քարտուղարն է, որը հրաժարվել է իր պաշտոնից, որ պահպանի կազմակերպության չեզոքությունը:
Հայ համայնքը, ըստ Արման Ավագյանի, կաջակցի իր ազգակիցներին․ այստեղ միայն խնդիր ունի Պասկալ Շամասյանը․ « Որպես պատգամավորության թեկնածու առաջադրվել է Մարսել քաղաքում, որի թաղամասերից մեկում առաջադրվել է նաև հայերի մեծ բարեկամ Վալերի Բուայեն՝ աջակողմյան Հանրապետական կուսակցությունից: Վալերի Բուայեն մշտապես այս թաղամասում դրել է իր թեկնածությունը և ընտրվել: Տպավորություն է, թե Մակրոնի թիմը ցանկանում է թուլացնել Բուայեին հենց իր ընտրատեղամասում՝ առաջադրելով հայազգի թեկնածուի այն դեպքում, որ Բուայեն հայերի կողմնակիցն է: Ես բարձր եմ գնահատում Բուայեի շանսերը, քանի որ հայերը սիրում են նրան», - ասաց նա:
Արման Ավագյանը նշեց, որ քիչ հավանական է, որ այլ ֆրանսիական քաղաքական ուժեր ևս իրենց ցուցակներում կներառեն հայերի:
Հիշեցնենք, որ «Առաջ» շարժման առաջնորդ Էմանուել Մակրոնը, մայիսի 7-ին հաղթել էր Ֆրանսիայի նախագահական ընտրությունների երկրորդ փուլում։ Մակրոնն ստացել էր քվեարկությանը մասնակցած քաղաքացիների ձայների 66,06 տոկոսը՝ մեծ առավելությամբ շրջանցելով «Ազգային ճակատ» կուսակցության ղեկավար Մարին Լը Պենին, ով ստացել է ձայների 33,94 տոկոսը։
Հայկական ընկերությունները համակարգող խորհուրդը հանդես էր եկել հայտարարությամբ, ըստ որի, նախագահական ընտրությունների երկրորդ փուլում աջակցելու էին Էմանուել Մակրոնին: