ԵԱՀԿ Մինսկի խումբն ամռանը կայցելի տարածաշրջան. Ռիչարդ Հոգլանդ
ԵԱՀԿ Մինսկի խմբի համանախագահները հունիսին կամ հուլիսի սկզբին կայցելեն տարածաշրջան: Այդ մասին հայտնել է ԵԱՀԿ ՄԽ ամերիկացի համանախագահ Ռիչարդ Հոգլանդը Վաշինգտոնում «Հայ-ադրբեջանական հակամարտության միջազգային քաղաքականությունը» համաժողովին ելույթ ունենալիս, գրում է «Թրենդ» գործակալությունը:
Ավելի վաղ հաղորդվել է, որ ՀՀ արտաքին գործերի նախարար Էդվարդ Նալբանդյանը նշել է, որ ԵԱՀԿ Մինսկի խմբի տարածաշրջանային այցի վերաբերյալ դեռ պետք է պայմանավորվել ժամկետների մասին:
Հարցին, թե ԵԱՀԿ Մինսկի խմբի համանախագահների այց տարածաշրջան երբ է նախատեսվում, Էդվարդ Նալբանդյանը պատասխանել է. «Դեռ ճշտված չէ: Երբ օրերը ճշտվեն, կասենք, որովհետև միայն մեզնից չէ կախված: Տարածաշրջանային այց պետք է լինի. պետք է թե՛ Հայաստան գան, թե՛ Ադրբեջան, թե՛ Արցախ: Դրա համար պետք է դեռ պայմանավորվել ժամկետների մասին»:
Հիշեցնենք, որ վերջին անգամ համանախագահները տարածաշրջան էին այցելել մարտին: Մասնավորապես, Բաքու այցը կատարվել էր մարտի 11-ին, Երևան՝ մարտի 27-ին, Լեռնային Ղարաբաղ՝ մարտի 28-ին: