Պետպատվերը չպետք է տալ այն բուժհիմնարկներին, որտեղ մարդկանցից փող են շորթում. մասնագետը առողջապահական ոլորտում ՄԻՊ-ի կարիք է տեսնում
Դեղաէկոնոմիկայի մասնագետ Մովսես Արիստակեսյանը համաձայն չէ վարչապետ Կարեն Կարապետյանի՝ Առողջապահության նախարարության հասցեին հնչեցրած դրական գնահատականների հետ, երբ այցելել էր և գոհ էր մնացել տարվող աշխատանքներից և միայն փոփոխությունների տեմպից էր դժգոհել:
«Բարձրացված հարցերն իսկապես հրատապ են, այժմեական և ճիշտ, բայց լուծումների մասին բավարար տեղեկություն չստացա: Այդուհանդերձ, կարծում եմ, որոշակի հարցեր անհրաժեշտ է բարձրացնել»,-ասաց նա և մի քանի կետերով առանձնացրեց ոլորտի խնդիրները:
«Նախ՝ առողջապահական բյուջեն շատ փոքր է, պետք է այն բարձրացնել մինչև ՀՆԱ-ի 5-6 տոկոսը, որպեսզի կարողանան առողջապահության ոլորտի բոլոր կարիքները հոգալ: Ինչու եմ ասում, որովհետև պետությունը հոգում է միայն պետական կառավարման հատվածի՝ 100 000 աշխատողների խնդիրը և ևս 615 000 հատուկ խմբերինը: Մնացած մարդկանց մասին, կարծես, պետությունն առայժմ չի ուզում մտածել»,- Tert.am-ի հետ զրույցում ասաց նա և ընդգծեց, որ դրանով պետությունը սահմանափակում է յուրաքանչյուր մարդու բժշկական օգնություն ստանալու իրավունքը:
«Այսինքն՝ պետությունն իր սուղ միջոցների հաշվին մտածում է միայն 700 000 քաղաքացիների մասին, իսկ մնացածներն ի՞նչ պետք է անեն»,- ասաց նա:
Ըստ մասնագետի՝ 2-րդ խնդիրը պետպատվերի հատկացման հատվածում է.
«Մրցույթ են հայտարարում, ձևական, տալիս են այն մարդկանց, ովքեր պետական կառավարման մարմիններում, այդ թվում նաև առողջապահության նախարարությունում ունեն իրենց առողջապահական կազմակերպությունները. նրանց տալիս են ինչ-որ փայ պետպատվերի, և այցելուն ընկնում է առևտրային առողջապահության ճիրաններ»:
Մովսես Արիստակեսյանի խոսքով՝ սա շատ լավ օգտագործում են բոլոր այն առողջապահական կազմակերպությունները, որոնք բարձր և անվերահսկելի գներ են սահմանում առողջապահական տարբեր ծառայությունների համար, անհամեմատ ավելի բարձր, քան պետպատվերով նախատեսված է: «Իհարկե, պետպատվերով նախատեսված սակագները ցածր են իրատեսական արժեքից, և համամիտ եմ, որ պետք է բարձրանան։ Այդ մասին խոսեցին նաև հանդիպման ժամանակ, այդուհանդերձ՝ պետք է երկրում մտցնել առողջապահական ծառայությունների գների կարգավորման ինստիտուտ»,- ասաց նա և նշեց, թե «Դեղերի մասին» օրենքով կարգավորման ինստիտուտը պետք է աշխատի 2018 հունվարից:
«Բայց դեղերի մասին օրենքով գրված է, որ մասնավորներին կանդրադառնան 2025 թ-ին, ինչն էլ աբսուրդ է։ Եթե պետական պատվերի շրջանակում անդրադառնում են դեղերի գների կարգավորմանը, ու եթե միաժամանակ չանդրադառնան մասնավոր հատվածին, ապա կլինի կեղծված դեղերի շրջանառություն»,-ասաց նա:
Մյուս խնդիրն, ըստ նրա, ստանդարտացման հարցն է: «Նայեն, թե ախտորոշիչ ինչպիսի ծառայություններ են մատուցում, սարքավորումներն արդյոք համապատասխանո՞ւմ են սերտիֆիկացմանը և ստանդարտներին, թե չէ անալիզը տանում ենք տարբեր լաբորատորիաներ ու տարբեր ցուցանիշներ ենք ստանում, ընդ որում՝ գները տարբեր են»,-ասաց նա:
Ըստ Արիստակեսյանի՝ կարևոր է, որ համակարգում գործի առողջապահության օմբուդսմենի ինստիտուտը: «Այն ենթադրում է, որ առողջապահական ոլորտի բոլոր տեսակի բողոքները, որոնք կան, քննվեն և մարդկանց իրավունքները պաշտպանվեն, ինչպես նաև առողջապահական համակարգի աշխատակիցների իրավունքները պաշտպանվեն: Նախագիծը ես պատրաստել եմ, պատրաստ եմ ներկայացնել նախարարին»,-ասաց նա:
Վերջում մասնագետը նշեց, թե պետք է կատարվի օպտիմալացում: «Պետպատվերը չպետք է հատկացնել այնպիսի արատավոր կազմակերպությունների, որտեղ միայն բիզնես են անում և միայն փող են շորթում քաղաքացիներից»,- եզրափակեց նա: