Սաուդյան Արաբիան և Վենեսուելան կոչ են անում երկարաձգել նավթի արդյունահանման կրճատման համաձայնագիրը
Նավթ արդյունահանող երկրների կազմակերպության (ՕՊԵԿ) գլխավոր քարտուղար Մուհամեդ Բարկինդոն հայտարարել է, որ Սաուդյան Արաբիան և Վենեսուելան բանակցություններ են վարում Վիեննայի համաձայնագրի երկրների հետ դրա հնարավոր երկարաձգման վերաբերյալ: Այս մասին հաղորդում է РИА Новости-ն:
«Ինչպես արդեն հայտարարել է Սաուդյան Արաբիայի էներգետիկայի նախարար Խալիդ ալ-Ֆալիհը, համաձայնության գալու մշտական ընթացակարգը շարունակվում է: Նա ներկայում առաջատար դիրք է զբաղեցնում համաձայնություն ձեռք բերելուն ուղղված ջանքերում, ինչը ժամանակ է պահանջում», - ասել է Բարկինդոն:
Վերջինս հավելել է, որ Վենեսուելայի նավթի նախարար Նելսոն Մարտինեսը ներկա պահին շրջագայություն է իրականացնում համաձայնագրի մասնակից երկրներում:
Ավելի վաղ հաղորդվում էր, որ ՕՊԵԿ-ի գլխավոր քարտուղարը ակնկալում է նավթի շուկայում հավասարակշռության հասնել 2017-ի վերջին: