«Լուրջ կոնֆլիկտ է լինելու, լուրջ ոտքեր պետք է տրորվեն, եթե մեխանիզմը գործի գցվի». Աշոտ Խուրշուդյանը՝ ապօրինի հարստացման դեմ օրենքի մասին (տեսանյութ)
ԵԱՏՄ–ի շրջանակներում շատ արագ փոփոխություններ են լինում, իսկ ՌԴ շուկան շատ մեծ է, բայց մեզ մոտ բացակայում է բիզնես կուլտուրան։ Tert.am-ի հետ զրույցում նման տեսակետ հայտնեց տնտեսագետ, Մարդկային զարգացման միջազգային կենտրոնի փորձագետ Աշոտ Խուրշուդյանն՝ անդրադառնալով ՀՀ ներդրումային միջավայրին և բիզնես զարգացմանը։ Նրա խոսքով՝ բիզնես միջավայրի սուբյեկտիվությունը և առկա ստվերը չեն թողնում, որ Կառավարության որոշումների, նորմատիվային ակտերի համաձայն գործարարը կառուցի իր բիզնեսը։
«Սպասում են ծանոթ, բարեկամ լինի, որ հասկանան, թե ինչպես և ինչ անել, որ ներդրում անեն։ Այսօր բիզնեսը դանդաղ է աշխատում, և Կառավարությունը պետք է մտածի, թե ինչ է պետք անել՝ պրոցեսն արագացնելու համար։ Անելը չի նշանակում միջամտել, բայց մյուս կողմից նշանակում է փոփոխություններ, որոնք այսօր շատ են։ Մատչելի դարձնել միջավայրը բիզնեսի համար, այսինքն՝ ավելի հասկանալի լինի, քանի որ պարտադիր չէ, որ բիզնեսմենը հասկանա բոլոր այդ թղթերից։ Մատչելիության առումով, միանշանակ, պետք է աշխատանք տարվի»,- ասաց նա։
Տնտեսագետը գտնում է, որ այսօր ներդրումներ ՀՀ-ում կատարվում են, սակայն շեշտում է, որ դրանք չի կարելի նախկին մեծ գումարների հետ համեմատել։
«Նախկինում ներդրումներն այլ որակի էին, այսինքն՝ հիմնականում սեփականաշնորհում էր կամ գույք պարտքի դիմաց։ Հիմա վարչապետը խոսում է այլ որակների ներդրումների մասին, ինչն իրոք դժվար է։ Կան ներդրումներ, որ գալիս են՝ հիմնականում ինֆորմացիոն տեխնոլոգիաների ոլորտ, այդ ոլորտն ինչ–որ չափով գրավիչ է դարձել, և միջազգային լուրջ կառույցներ արդեն այստեղ մասնաճյուղեր ունեն։ Հաջող փորձ ունենք նաև բրենդային, տեքստիլ ոլորտում, այսինքն՝ բիզնեսն աշխատում է և ներդրումներ է բերում։
Թե ինչպես ՀՀ-ն ներկայանա, թե ինչ ներդրումներ ենք ցանկանում։ Այ այստեղ է հիմնական խոչընդոտը՝ կոռուպցիայի ընկալումը»,– շարունակեց տնտեսագետը։
Խուրշուդյանը նշեց, որ բիզնես և ներդրումային ոլորտի աշխուժացման համար Կառավարությունն իր հակակոռուպցիոն թևը պետք է ուժեղացնի։ Դիտարկմանը, որ այսօր հակակոռուպցիոն ոլորտի օրենսդրությունը փոփոխության է ենթարկվում, և հարցին՝ արդյոք սա դրական ազդեցություն չի՞ ունենա, Խուրշուդյանն արձագանքեց.
«Այո՛, ռիսկային օրենքը՝ անօրինական հարստացման դեմ, ընդունվեց, ինչը բավականին ռիսկային է։ Օրենքի իրացումը բավականին լուրջ է, օրինակ՝ Լիտվայում պրոֆեսորի աղջիկը բնակարան էր գնել, սակայն առգրավեցին այն, քանի որ չէր ասել, թե ինչ աղբյուրներից է գնել, միայն ասել էր՝ հորս փողերով է, իսկ հայրն այդ եկամուտները չէր հայտարարագրել։ Ինձ թվում է՝ մեր մեծահարուստները չեն հասկացել, որ օրենքի կիրառումը դա է ենթադրում, որովհետև կարող է 20 մլն դոլարով գործարան ձեռք բերել, սկսվի դատական գործընթաց և աղբյուրը չկարողանա ցույց տալ, այնուհետ այդ 20 մլն-ը պետությունն առգրավի։ Սա է հետևանքը և հարց է՝ մենք սա կտեսնենք, թե ոչ։ Ինչպե՞ս են աշխատելու հետաքննությունն ու մեխանիզմները, քանի որ նույն մարդիկ 2 տարի շարունակ նույն հայտարարագիր են ներկայացնում՝ առանց որևէ փոփոխության։ Լուրջ կոնֆլիկտ է լինելու, լուրջ ոտքեր պետք է տրորվեն, եթե մեխանիզմը գործի գցվի»,– ընդգծեց Խուրշուդյանը։
Մարդկային զարգացման միջազգային կենտրոնի փորձագետի կարծիքով՝ անօրինական հարստացման դեմ օրենքը լիարժեք կլինի, եթե խոշոր եկամուտ ունեցող ոչ պետական պաշտոնյաները նույնպես հայտարարագրեն իրենց եկամուտները։
Մանրամասները՝ տեսանյութում։