Հայաստան ժամանող զբոսաշրջիկների թիվը 18.2%-ով աճել է. Զարմինե Զեյթունցյան
Առաջին եռամսյակում դեպի Հայաստան զբոսաշրջիկների թիվը 2016 թվականի նույն ժամանակահատվածի համեմատ աճել է 18,2 տոկոսով: Այս տարվա առաջին եռամսյակում Հայաստան է այցելել 599 հազար 341 զբոսաշրջիկ, նախորդ տարվա նույն ժամանակահատվածում՝ 498 հազար 291 զբոսաշրջիկ:
Այս մասին այսօր Ռուսաստանում հայկական զբոսաշրջային արդյունքի ներկայացման ու խթանման գործընթացի թեմայի շուրջ լրագրողների հետ հանդիպման ժամանակ ասաց ՀՀ տնտեսական զարգացման և ներդրումների նախարարության Զբոսաշրջության պետական կոմիտեի նախագահ Զարմինե Զեյթունցյանը:
«Այցելությունների թիվը Հայաստան աճել է 18,2 տոկոսով, որը բավականին զգալի ցուցանիշ է: Հիմնական աճն ապահովել է Իրանի շուկան՝ 17,7 տոկոս, Ռուսաստանի շուկան՝ 7,5 տոկոս, առաջին հնգյակում են նաև Չինաստանը, Գերմանիան, Ֆրանսիան»,-ասաց նա։
Անդրադառնալով Ռուսաստանում հայկական զբոսաշրջային արդյունքի ներկայացմանն ու խթանմանը՝ Զեյթունցյանն ասաց, որ Ռուսաստանում ակտիվ սկսվել է այդ գործընթացը, առաջին միջոցառումը տեղի է ունեցել Մոսկվայում մարտի 31-ից ապրիլի 1-ը, անցկացվել է «Հայաստան, իմ յոթերորդ զգայարան» խորագրով միջոցառումը:
«Այնտեղ ներկայացրինք Հայաստանի և Արցախի զբոսաշրջային արդյունքը, ուր մեկնել էինք մի քանի տուրօպերատորների հետ, իսկ հիմնական միջոցառումը տևել է երկու օր՝ փակ և բաց ձևաչափով: Առաջին օրը զբոսաշրջային արդյունքը ներկայացվել է ավելի փակ հանրությանը, խոսվել է Հայաստանում կարճաժամկետ հանգիստ անցկացնելու մասին, ներկայացվել է խոհանոցը»,-ասաց Զեյթունցյանը:
Նրա խոսքով՝ հիմնական նպատակն է եղել Ռուսաստանում ներկայացնել Հայաստանն իր բոլոր կողմերով՝ մշակույթ, արվեստ, խոհանոց:
Զեյթունցյանը հայտնեց, որ խմբում ներգրավված է եղել նաև Հայաստանում բնակվող ռուսազգի ներկայացուցիչ, ով ներկայացրել է Հայաստանը նեղ հանրությանը:
Ինչ վերաբերում է Հայաստանի զբոսաշրջային արդյունքը լայն հասարակությանը ներկայացնելուն, ապա Զարմինե Զեյթունցյանն ասաց, որ երկու-երեք ժամվա ընթացքում ցուցասրահ է այցելել մոտ 3000 այցելու, որտեղ նաև մրցույթ է անցկացվել. «Բոլոր նրանք, ովքեր կնկարվեին հայկական բաների առաջ և համապատասխան հեշթեգով կտեղադրեին սոցիալական ցանցերում, հնարավորություն ունեին շահել ուղևորություն դեպի Հայաստան: Ամենաշատ «լայքերի» շնորհիվ շահող կա, և շուտով նա կայցելի Հայաստան»:
Բացի այդ, Զարմինե Զեյթունցյանը խոսեց մի շարք համագործակցությունների մասին, որոնցից մեկն էլ Հայաստանի մասին ռուսալեզու բրոշյուրի տպագրումն է եղել:
Ասուլիսին ներկա EXPO GROUP ընկերության հիմնադիր տնօրեն Վահագն Միրիջանյանն էլ հայտնեց, որ այս ապրիլի 21-23-ը Հայաստանում չորրորդ անգամ կանցկացվի «InTourExpo 2017-ի զբոսաշրջային ամենամյա ցուցահանդեսը, որը միջազգային մասշտաբների չէ, սակայն միջազգային մակարդակի է:
«Այստեղ տարեցտարի մենք բավական դրական դինամիկա ենք նկատում: Այս տարի ցուցահանդեսի կարևոր գործընկերն է Ռուսաստանը, ունենք մասնակիցներ նաև Իրանից, Վրաստանից, Եգիպտոսից: Մասնակցելու են նաև տեղական ընկերությունները»,-ասաց նա։