Գունավոր հեղափոխությունները ՀԱՊԿ երկրներում կանխելու մասին խոսելիս՝ Պուտինը նախևառաջ Բելառուսն է նկատի ունեցել. Նարեկ Մինասյան
Ռուսաստանի Դաշնության նախագահ Վլադիմիր Պուտինը, գունավոր հեղափոխությունները ՀԱՊԿ անդամ երկրներում կանխելու մասին խոսելիս, նախևառաջ Բելառուսն ու Ռուսաստանն է նկատի ունեցել, և ոչ թե Հայաստանը:
Tert.am-ի հետ զրույցում այսպիսի կարծիք հայտնեց «Հայացք» վերլուծական կենտրոնի փորձագետ Նարեկ Մինասյանը՝ նկատելով, որ Վլադիմիր Պուտինն իր խոսքում երկրների անուններ չի տվել:
«Ռուսաստանյան փորձագիտական շրջանակներում գունավոր հեղափոխությունների նկատմամբ կա որոշակի կանխակալ մոտեցում: Նրանք դրանք դիտարկում են որպես Արևմուտքի կողմից հրահրվող գործընթացներ, որոնք նպատակ ունեն տապալել տարբեր երկրներում գոյություն ունեցող կառավարման համակարգը: Այն փափուկ ուժի կիրառման ձևերից է համարվում»,-ասաց նա:
Հիշեցնենք, որ Ռուսաստանի նախագահ Վլադիմիր Պուտինը «Միր» հեռուստաընկերությանը տված հարցազրույցում հայտարարել է, որ Ռուսաստանի ղեկավարությունը չպետք է թույլ տա իր երկրում կամ Հավաքական անվտանգության պայմանագրի կազմակերպության մյուս երկրներում գունավոր հեղափոխությունների իրականացումը:
Նարեկ Մինասյանը նկատեց, որ ՀԱՊԿ երկրներից որոշակի անհանգստություններ նկատվել են Բելառուսում, Ռուսաստանում, հիշատակեց, որ մեկ ամիս առաջ այդ երկրներում սոցիալական հուզումներ են եղել:
«Փորձագիտական կարծիքների հայտնվեցին դաշտում, որ սա, հնարավոր է՝ Արևմուտքի կողմից հերթական գունավոր հեղափոխության սցենարի խաղարկման փորձ լինի, սակայն այդ հուզումների մասշտաբները շատ փոքր էին, որպեսզի նրանց գունավոր հեղափոխություն համարենք»,- ասաց նա:
Վերլուծաբանի խոսքով՝ ՀԱՊԿ անդամ երկրներին ուղղված ցանկացած սպառնալիք կամ վտանգ քննարկվում է տարբեր ձևաչափերով՝ և՛ երկրների ղեկավարների, և՛ անվտանգության խորհուրդների ղեկավարների մակարդակով:
«Բնականաբար բոլոր հարցերը և վտանգները քննարկվել են և քննարկվելու են: Գունավոր հեղափոխությունների հետ կապված որոշակի խմբագրումներ ևս արվում են, և դա նորություն չէ: Այլ հարց է, որ հենց Ռուսաստանի նախագահի կողմից է դա բարձրաձայնվել»,- ասաց նա:
Նարեկ Մինասյանի խոսքով՝ գունավոր հեղափոխությունների մասին ռուսաստանյան և արևմտյան վերլուծաբանների մոտեցումները տարբեր են, վերջինները մերժում են, որ նման գործընթաց կա, իսկ առաջինները պնդում են՝ Արևմուտքի կողմից հետևողականորեն նման քաղաքականություն է տարվում հատկապես հետսովետական երկրների տարածքում:
«ՀԱՊԿ-ի շրջանակներում կան որոշակի երկրներ, որոնք ունեն ավտորիտար բնույթ: Նման երկրներում ցանկացած տիպի միջամտություն զգուշավորությամբ է ընդունվում: Նաև պայմանավորված լինելով այդ երկրների ավտորիտար բնույթով՝ դրանք ընկալվում են որպես գունավոր հեղափոխության փորձեր»,- նշեց նա:
ՀԱՊԿ անդամ երկրներից ամենաավտորիտարները, ըստ վերլուծաբանի, ցանկացած անհնազանդության փորձ զսպում են: «Օրինակ, Ռուսաստանում գործում է օրենք հասարակական կազմակերպությունների արտասահմանյան ֆինանսավորման հետ կապված․ փորձել են խստացնել իրավական շրջանակները և հնարավորինս նեղացնել ֆինանսական այն հնարավորությունները, որոնք կարող են ստանալ արտասահմանից»,- նշեց Նարեկ Մինասյանը՝ միաժամանակ նշելով, որ դա հատուկ չէ բոլոր ՀԱՊԿ-ական երկրներին: Նա մասնավորեցրեց, որ օրինակ Հայաստանում հ/կ-ներին վերաբերող օրենքը ավելի լիբերալիզացվել է՝ ֆինանսական հնարավորություններ ձեռք բերելու հարցում:
Վերլուծաբանը, ամփոփելով իր խոսքն ու վերադառնալով նորից Պուտինի հայտարարությանը, նշեց. «Ամեն երկիր, անգամ ՀԱՊԿ-ի շրջանակներում, առանձնանում է սեփական կարիքներով, սեփական անվտանգության ռիսկերով և փորձում է դրանք կանխել: Եվ որքան ավտորիտար է երկիրը, ռիսկերն այնքան ավելի շատ են, և հետևաբար նաև արտաքին միջամտություններն են շատ»։