Երևանի ճարտարապետությունը, հարմոնիան, էներգետիկան. փոխվե՞լ է արդյոք Երևանի դիմագիծը
Ճարտարապետ Սաշուր Քալաշյանը գտնում է, որ Երևանի դիմագիծը, առանձնահատկությունները, կոլորիտը վերջին տարիներին չեն պահպանվել:
«Բիզնեսը ներխուժել է քաղաք և արհամարհել ամբողջ կարգ ու կանոնը, ինչի հետևանքով քաղաքի դիմագծի խեղում կա»,-Tert.am-ի հետ զրույցում ասաց նա:
Ըստ նրա` խնդիրը ավագանու աշխատանքի մեջ չէ, քանի որ այն քաղաքաշինական, ճարտարապետական խնդիրներ լուծող կազմակերպություն չէ, այլ բյուջեն ռացիոնալ տեղաբաշխող կազմակերպություն է, և խնդիրը գլխավոր ճարտարապետի, վարչական մարմիններինն է:
«Այստեղ ճարտարապետության խնդիր չէ, այլ պետական քաղաքականության, ըստ որի` մշակույթը հետին պլան է մղվել, և առաջնահերթությունը տրվել է գումարին: Ճարտարապետությունը միջավայրի ընդհանրությունն է, իսկ մեզ մոտ դա խախտվել է, միջավայրի հարմոնիան վերացել է: Շենքերից ամեն մեկն իր ներքին կենսագրությունը ունի, ամեն մեկն իր խնդիրն ունի և թքած ունի հարևան շենքի վրա»,-ասաց նա և նշեց, որ ամենակարևորը օրենքը խախտողին պատժելն է:
Ճարտարապետը նշեց, որ նորամուծություն ամեն երկրում էլ կա, սակայն այն պետք է ենթարկվի ճարտարապետական օրենքներին, համահունչ լինի կողքի շենքին, ինչպես արվում է շատ քաղաքակիրթ երկրներում:
«Եթե օրենքի գերակայություն չկա, կա մենակ քմահաճույք, որին ենթարկվում է օրենսդրական դաշտը, ապա նշանակում է, որ պետական մտածելակերպ գոյություն չունի: Օրենքները կան, սակայն չեն կիրառվում. այնտեղ, որտեղ օրենքը խանգարում է բիզնեսին, օրենքը լուրջ փոփոխությունների են ենթարկում»,-ասաց նա:
Սաշուր Քալաշյանը նշեց, որ ոչ մի տրամաբանություն չկար «Երիտասարդական պալատը» քանդելու մեջ, իսկ ներկայումս էլ վտանգի տակ է համարում «Զվարթնոց» օդանավակայանը, «Ռոսիա» կինոթատրոնը:
ՀՀ վաստակավոր արտիստ, երգիչ դերասան Արամոն նշեց, որ քաղաքում կան նորամուծություններ, որոնք իսկապես իրեն դուր են գալիս և կարևոր համարեց, որ քաղաքը մաքուր է:
«Կան շենքեր, որոնք ինձ չեն գոհացնում, կան շենքեր, որոնք գոհացնում են և քաղաքի ճարտարապետության հետ շատ գեղեցիկ են, քաղաքի մեջ ապրում են: Ես կցանկանամ, որ մեզ ժառանգված շենքերը պետության կողմից պահպանվեն և կարծում եմ, որ Թամանյանի ճարտարապետական լուծումները ֆանտաստիկ են»,-ասաց նա և նշեց, որ պատմամշակութային շենքերն անհրաժեշտության դեպքում պետք է ամրացնել, վերանորոգել, սակայն պարտադիր է համարում ֆասադը պահպանել:
Արամոն նշեց, որ Երևանը իր ամենասիրելի քաղաքն է:
«Շատ կարևորում եմ Երևանի մթնոլորտը, էներգետիկ դաշտը, այն շատ բարի է, շատ գեղեցիկ է: Դու այստեղ ապրում ես, շնչում ես, վայելում ես, տխրում ես, ուրախանում ես, բարի աուրա կա, սեր ուրախություն, ինչո՞ւ չէ՝ նաև տխրություն կա, սակայն դրական էներգետիկա է տալիս քաղաքը»,-ասաց նա և նշեց, որ քաղաքի համ ու հոտը պահպանում են մարդիկ:
Երգիչն ասաց, որ իրեն դուր է գալիս նոր Երևանը, նոր սերունդը, որը շատ լավն է, պայծառ է և ներկայիս երիտասարդների համար Երևանը մի քիչ ուրիշ է, իսկ իր համար այն այլ է եղել: Նա թվարկեց իր սիրած փողոցները և նշեց, որ թեև սիրած վայրեր շատ կան, բայց մի քանի տեղ կա, որտեղ սիրում է սուրճ խմել:
«Ես առաջին հերթին կցանկանայի, որ մեր բոլոր շենքերի տանիքիները լինեն միանման, պաստառները լինեին ապակու մեջ, լուսավորված, ցիվիլ, կանաչապատումը շատ լիներ»,-ասաց նա: Արամոն հայտնեց նաև, որ իրեն ավագանու մի քանի կուսակցությունների ցուցակում ընդգրկվելու առաջարկ եղել է, սակայն նշեց, որ ինքը արվեստի մարդ է, և պահը դեռ չի եկել, երբ գա ժամանակը, կընդգրկվի: