Դաշնակցությունը ՀՀԿ-ին ավելի ձեռնտու կլինի որպես գործընկեր, ոչ թե հակառակորդ. Սերգեյ Մինասյան (տեսանյութ)
-Պարո՛ն Մինասյան, Հայաստանում կայացան խորհրդարանական ընտրությունները և արդեն իսկ մոտավորապես պարզ է, թե խորհրդարանում ինչ ուժեր են ներկայացված լինելու։ Ի՞նչ ակնկալիքներ կա նոր խորհրդարանից։
-Մենք փաստացի ունենք մի իրավիճակ, որ առաջին անգամ կունենանք խորհրդարան խորհրդարանական կառավարման իրավիճակի պայմաններում, որը մեկ տարուց հետո կլինի վճռորոշ քաղաքական էլեմենտը ՀՀ քաղաքականության մեջ։ Կարծում եմ՝ մոտակա մեկ տարվա ընթացքում, սահմանադրական առանձնահատկությունից ելնելով, խորհրդարանը կսկսի նոր գործընթացներին հարմարվել, քաղաքական ուժերը կփորձեն նոր լծակներն ավելի հստակ օգտագործել։ Բացի սրանից նաև բոլորին կհետաքրքրի, թե նախագահ Սերժ Սարգսյանն ի՞նչ ձևով կփորձի իր հնարավորությունները նաև խորհրդարանում օգտագործել 2018 թվականի ապրիլից հետո։ Ենթադրում եմ, որ այն հանգամանքը, որ մնալով կուսակցության ղեկավար, այդ ժամանակ արդեն չհանդիսանալով երկրի նախագահ, մեծ հավանականություն կա, որ Սերժ Սարգսյանը չի լինելու նաև վարչապետ, հենց խորհրդարանի ներսում ունեցած իր հանրապետական լծակները կօգտագործի որպես վճռորոշ քաղաքական ուժ ՀՀ քաղաքական զարգացումներում՝ լինի դա Կառավարության կազմումը կամ այլ ոլորտներ։
-Խորհրդարանն օրենսդիր մարմին է համարվում։ Ի՞նչ եք կարծում՝ ընտրված մարդիկ կկարողանան կատարել օրենսդրի աշխատանքը։
-Իրականում, խորհրդարանի այս կազմն ավելի մասնագիտացված ու ավելի կրթված պատգամավորներ կունենանք, քան նախկին ԱԺ–ն։ Սակայն հասկանալի է նաև, որ պարտադիր չէ, որ բոլոր պատգամավորները լինեն քաղաքագետներ կամ իրավաբաններ, քանի որ նրանք առաջին հերթին քաղաքական գործիչներ են։
Իրենց իրավական ու օրենսդիր գործունեության առումով նրանք կունենա համապատասխան շտաբ և օգնականներ, ինչպես նաև համապատասխան այլ պետական մարմինները կաջակցեն։
-Ի՞նչ եք կարծում՝ այս անգամ Դաշնակցությունը կոալիցիա կկազմի՞ Հանրապետականի հետ և խորհրդարանում վերջնականապես կլուծվի՞ կայուն մեծամասնության խնդիրը։
-Ինչպես նախկին ԱԺ–ում, այս անգամ էլ Հանրապետականն ունի միանձնյա Կառավարություն կազմելու հնարավորություն։ Կարծում եմ՝ ելնելով այն տրամաբանությունից, որ Դաշնակցությունը կա նաև սփյուռքում, ունի հստակ ու կոշտ գաղափարախոսություն Թուրքիայի հետ հարաբերությունների և Արցախի հարցում, հաշվի առնելով նաև այն, որ նմանատիպ կոալիցիայում դաշնակցականները վճռորոշ դեր չեն խաղալու, բայց ավելացնելու են հասարակական ու քաղաքական հիմքը, կկազմեն կոալիցիա։ Սա նշանակում է, որ ՀՀԿ–ին մի քանի պորտֆելների գնով, ավելի ձեռնտու կլինի Դաշնակցությունը, որպես գործընկեր, այլ ոչ թե որպես հակառակորդ։
-Ընդդիմադիրներից «Ելք»–ը մտավ խորհրդարան, ի՞նչ եք կարծում՝ «Ելք»–ն այն ուժն է, որը կկարողանա խորհրդարանում բարձրացնել հասարակությանն անհանգստացնող խնդիրները և ռեսուրս ունի՞ դրանց լուծում տալու։
- Բարձրացնելու ռեսուրս ունի, հնչեցնելու ու ներկայացնելու էլ կունենա։ Լուծելու՝ չեմ կարծում, որովհետև ձայների առումով վճռորոշ դեր չի կարող խաղալ խորհրդարանում։ Ընդհանրապես այս ընտրությունների գլխավոր բացասական հանգամանք այն է, որ ունենք մի իրավիճակ, որ տեսանելի ընդդիմադիր ուժերի հիմնական հատվածը հանդիսանալու է ոչ խորհրդարանական։ «Ելք»–ը մոտակա 5 տարվա ընթացքում կլինի հիմնական ընդդիմադիր ուժը, եթե չլինեն ֆորսմաժորային իրավիճակներ։
Հարցազրույցը՝ Անի Արամի