ԵԱՏՄ-ն շատ դանդաղ է առաջ գնում, դրանից պետք է ՀՀ-ն օգտվի՝ կարևոր հարցերի շուրջ պայմանավորվածություն ունենալով ԵՄ հետ․ Արթուր Ղազինյան
Եվրոպական ուսումնասիրությունների կենտրոնի ղեկավար Արթուր Ղազինյանը, Tert.am-ի հետ զրույցում խոսելով Հայաստան-Եվրամիություն շրջանակային համաձայնագրի շուրջ բանակցություններից, նշեց, որ ԵՄ-Հայաստան հարաբերությունների ֆորմատը իրեն չի բավարարում, նշեց, որ կարծում է՝ մենք ունենք ավելի շատ պոտենցիալ:
«Մենք պետք է շարունակեինք ասոցացման գործընթացը, բայց քանի որ իրավիճակն այնպես ձևավորվեց, որ չկարողացանք դա շարունակել, հիմա ունենք այն, ինչ ունենք: Մենք առավելագույնը Հայաստան-ԵՄ շրջանակային համաձայնագրից կարող ենք սպասել գործող Գործընկերության և համագործակցության համաձայնագրի update (թարմացում) արված տարբերակ, քանի որ այն հնացած փաստաթուղթ էր, և պետք է մշակվեր նորը՝ նոր իրողությունների, նոր քաղաքական, տնտեսական իրավիճակի հիման վրա»,- ասաց նա:
Ըստ Արթուր Ղազինյանի՝ մենք հիմա համաձայնագրի ստորագրումով կտեսնենք հավաստում, արձանագրում, որ կողմերը հանձնառու են միասին աշխատելու տարբեր կրթական, տնտեսական, քաղաքական ոլորտներում և այստեղ կհամագործակցեն այնքանով, որքանով չեն հակասի ԵԱՏՄ-ում ստանձնած պարտավորություններին:
«Ես չեմ կարծում, որ համաձայնագրի մեջ կնշվի ԵԱՏՄ բառը: Հուսադրող է այն, որ այն բոլոր պարտավորությունները, որոնք կնշվեն Հայաստան-Եվրամիության մասով ,ներկայումս չեն կանոնակարգվում ԵԱՏՄ պայմանագրով կամ դրա հիման վրա ընդունված այլ ակտերով, հետագայում Հայաստանը չի կարողանալու միանալ ԵԱՏՄ ընդունած ակտերին, ինքն արդեն կունենա Եվրամիության հետ ստանձնած այլ պարտավորվածություններ: Արդեն կունենանք բավականին մրցակցային իրավիճակ»,- ասաց նա:
Արթուր Ղազինյանը նկատեց, որ Հայաստանը, որպես առանձին սուբյեկտ, իսկապես չի կարողանում տնտեսական ոլորտում համագործակցել այլ երկրների հետ, որովհետև այստեղ իրավական պարտավորվածություններ ունի Եվրասիական տնտեսական միության առջև: «Հայաստանը կորցրել է իր իշխանության մի մասը, մասնավորապես տնտեսական քաղաքականությունը մշակելու և իրականացնելու ոլորտում: Հայաստանը չի կարող ինքնուրույն որոշել որևէ երկրի հետ մաքսային տարիֆների հարցը, այդ հարցը կանոնակարգվում է ԵԱՏՄ-ի միասնական օրենսգրքով»,- ասաց նա՝ հավելելով, որ երևի թե Եվրամիության հետ Հայաստանը մաքսային տարիֆների հետ կապված հարցեր չի քննարկի:
Ըստ Արթուր Ղազինյանի՝ առավել հավանական է, որ Եվրամիությունը Հայաստանի հետ քննարկի ներդրումային որոշակի փաթեթների, սանիտարական նորմերի հաստատման հետ կապված հարցեր, որոնք դեռևս կանոնակարգված չեն ԵԱՏՄ-ի հետ համագործակցության շրջանակներում:
«Այն բոլոր ոլորտները, որոնք չեն կանոնակարգվում Եվրասիական տնտեսական միության հետ համագործակցության շրջանակներում, դրանք բաց են, որպեսզի կարգավորվեն Եվրամիության հետ հարաբերություններում: Եթե Հայաստանին հաջողվի այդ հարցերում պայմանավորվել Եվրամիության հետ, հետո որ ԵԱՏՄ ցանկանա այդ ոլորտները կանոնակարգել, չի կարողանա, քանի որ Հայաստանը պարտավորվածություն կունենա արդեն ԵՄ-ի հետ»,- ասաց նա:
Արթուր Ղազինյանի դիտարկմամբ՝ Եվրասիական տնտեսական միությունը շատ դանդաղ է առաջ գնում, և դրանից պետք է Հայաստանն օգտվի ՝ կարևոր հարցերի շուրջ պայմանավորվածություն ունենա Եվրամիության հետ:
Նա նաև չբացառեց, որ Եվրամիության հետ պայմանավորվածությունների մասին Հայաստանը երրորդ երկրներին՝ մասնավորապես Ռուսաստանին «զեկուցում է»: «Հնարավոր է՝ տեղեկատվության փոխանակման խողովակներ կան, ես, այնուամենայնիվ, կարծում եմ, որ Հայաստանը Ռուսաստանի հետ խոհրդակցություններ է արել՝ կապված Եվրամիության հետ համաձայնագրի հետ»:
Նա Ռուսաստանի լռությունը՝ կապված Հայաստան-ԵՄ հարաբերությունների զարգացման հետ, պասիվություն չհամարեց: «Այն, որ բարձրաձայն չի խոսվում, չի նշանակում, որ ոչինչ չի արվում:Ես վստահ եմ, որ կա ներքին դիվանագիտություն, իրենց խողովակներով հաղորդվում են իրենց մտահոգությունները՝ կապված Հայաստան-ԵՄ խորացող հարաբերությունների հետ: Ռուսաստանն իր դիրքորոշումը կարտահայտի՞ վերջում, թե՝ ոչ, ես չգիտեմ, ամենայն հավանականությամբ թույլ կտան Հայաստանին իր հարաբերությունները ԵՄ-ի հետ խորացնել այնքան, որքանով դա չի խախտի ԵԱՏՄ-ի հետ ստանձնած Հայաստանի պարտավորություններին»,- ասաց նա: