Սահակ Սրբազանը Արամ Աթեշյանին ուղղած բոլոր քննադատություններն իր սեփական ստորագրությամբ հերքել է․ Արա Գոչունյան
Սուրբ Փրկիչ հայկական հիվանդանոցի գործադիր խորհրդի նախագահ Պետրոս Շիրինօղլուի հետ Պոլսո պատրիարքի փոխանորդ Արամ Աթեշյանի և Սահակ սրբազան Նաշալյանի առանձնազրույցն իր արդյունքները տվեց․երկու սրբազանները որոշեցին մի կողմ դնել անձնական հարցերը և դարձյալ համագործակցել հավաքական շահերի գիտակցությամբ ու պատասխանատվությամբ: Tert.am-ի հետ զրույցում այս մասին պատմեց Ստամբուլում լույս տեսնող «Ժամանակ» թերթի խմբագիր Արա Գոչունյանը, ով զարգացումներին անձամբ հետևել է իրադարձությունների վայրից:
«Համայնքի աշխարհականները՝ գլխավորությամբ Պետրոս Շիրինօղլուի առանձնազրույց ունեցան սրբազանների հետ: Հետո նրանց հետ զրուցողների թիվն ընդլայնվեց,- ասաց նա՝ նշելով, որ ժողովում շեշտվեց, որ պատրիարքական ընտրության անցկացումը հրամայական է, պատրիարքական ընտրությունները ժողովրդի պահանջն են, ընտրության վերաբերյալ երկու եպիսկոպոսներն էլ ունեն համապատասխան կամք, - նշվեց, որ անհրաժեշտ է, որ երկու եպիսկոպոսների հարաբերությունները նորմալ լինեն, որպեսզի ընտրության համար դիմումը ներկայացվի, գործընթացը նորմալ հունով ընթանա»:
Հիշեցնենք, որ Պոլսո Հայոց Պատրիարքարանի Կրոնական ժողովի ատենապետ տեր Սահակ եպիսկոպոս Մաշալյանը հրաժարական է տվել և հրաժարական է տվել ոչ միայն Կրոնական ժողովի ատենապետի, այլև՝ պատրիարքարանին կից գործող «Հովակիմ 1461» հիմնարկի փոխատենապետի պաշտոնից, ինչպես նաև իր թեկնածությունն է հանել Պոլսո պատրիարքական հնարավոր ընտրությունից:
Արա Գոչունյանի պատմելով՝ երկու սրբազաններն էլ համայնքային ժողովի ժամանակ խոստացան, որ իրենց մեջ եղած խնդիրները պետք է մի կողմ դնեն, պոռթկումներից զատ՝ ընտրություններ անցկացնեն: «Սահակ սրբազանն էլ պատրաստակամ վերաբերմունք արտահայտեց դրա վերաբերյալ»,- ասաց նա:
Արա Գոչունյանը պատմեց, որ համայնքի հավաքի ժամանակ շատ բան է քննարկվել, նաև ընտրությունների անցկացման հնարավոր ամսաթիվը: Ժողովի վերջում արձանագրություն կազմվեց: «Այդ արձանագրությունը հապշտապ էր կազմված: Այն փաստում էր, որ երկու եպիսկոպոսները հաշտվել են, համաձայնության են եկել պատրիարքական աթոռի ընտրություններն առաջ տանելու համար և ուզում են, որ ժողովուրդն իմանա, որ իրենք նախանձախնդիր են ընտրությունների անցկացման հարցում»,- ասաց նա:
«Ժամանակի» խմբագրի խոսքով՝ համայնքի առաջնորդների շրջանում եղած քննարկումից հետո պետք է քննարկում լիներ նաև պատրիարքարանի շուրջը հավաքված համայնքի ներկայացուցիչների հետ, սակայն այստեղ իրադարձություններն անցանկալի զարգացումներ ունեցան:
«Ժողովի ժամանակ եղած արձանագրությունը ներկայացվեց պատրիարքարանի շուրջը հավաքված համայնքի մոտ 200 անդամի, որոնք հետաքրքրված էին հարցով: Նրանք վրդովվեցին իրենց ներկայացրածից, նրանց ոչինչ չէր բավարարում: Անգամ թուրքական ոստիկանությունը ժամանեց, որ կրքերը հանդարտեցներ: Երկու եպիսկոպոսներն էլ տեղեկացան, որ ոստիկանական միջամտություն է տեղի ունեցել»,- պատմեց նա՝ նշելով, որ այդ իմանալով՝ սրբազանները եկան եզրահանգման, որ անցումային բարդ շրջանում համայնքում հակասություններ չպետք է լինեն:
Հիմա, ըստ Արա Գոչունյանի, Սահակ սրբազանը մնում է Կրոնական ժողովի ատենապետ, իր առաքելությունը շարունակում է, չնայած որ իր բաց նամակում նա նշել էր, որ լքում է Կրոնական ժողովի ատենապետի աթոռը, իսկ Tert.am-ի հետ զրույցում նշել, որ ինքը կվերադառնա միայն այն ժամանակ, երբ Արամ Աթեշյանը լքի պատրիարքարանը:
Արա Գոչունյանի խոսքով՝ Պոլսո պատրիարքարանում այժմյան իրավիճակի ստեղծման օրվանից Ամենայն Հայոց կաթողիկոս Գարեգին Բ-ն մշտական կապի մեջ է Արամ Աթեշյանի և Սահակ Մաշալյանի հետ: Ըստ նրա՝ չնայած որ չի բարձրաձայնվում, բայց երեք օր հետո եպիսկոպոսների միջև եղած հաշտությունը նաև Ամենայն Հայոց կաթողիկոսի շնորհն է: «Երեքշաբթի նրանք պետք է ուղևորվեն Մայր աթոռ Սուրբ Էջմիածին: Պատրիարքարանի աղբյուրները բնականաբար այդտեղի խոսակցության հնարավոր թեմաների մասին բան չեն ասում»,- ասաց նա՝ նշելով, որ այդ հանդիպումը սիմվոլիկ բնույթ է կրելու, քանի որ վեհափառը իրավասություններ չունի ազդելու Պոլսո պատրիարքարանի վրա,-դրական նշան է, որ սրբազանները պարտավորվածություն են վերցրել Մայր Աթոռ սուրբ Էջմիածնում՝ հայոց հոգևոր կենտրոնում, եկեղեցու եղած խնդիրներ լուծելու»:
Հարցին, թե ինչու պատրիարքարանը հիմա չի դիմում Թուրքիայի իշխանություններին ընտրություններն անցկացնելու համար, Արա Գոչունյանը պատասխանեց, որ հիմա չի կարելի, պետք է սպասել Թուրքիայում սահմանադրական հանրաքվեի ավարտին:
Դիտարկմանը, թե Թուրքիայի իշխանությունների թույլտվությունը պետք չէ ընտրությունների անցկացման համար, նա պատասխանեց․ «Տեղեկանք ես, չէ՞, ներկայացնում, հետո պե՞տք է սպասես արձագանքի»:
Մյուս դիտարկմանը, թե Սահակ սրբազանը հենց պատրիարքարանի ընտրությունների անցկացումն անընդհատ հետաձգման հետ կապված էր դժգոհություն արտահայտել և մեղադրել Արամ Աթեշյանին, Արա Գոչունյանը պատասխանեց․ «Սահակ Սրբազանը Արամ Աթեշյանին ուղղած բոլոր քննադատությունները իր սեփական ստորագրությամբ հերքել է: Իրենք փոխըմբռնման են եկել»,- ասաց նա՝ հավելելով, որ հիմա պետք է սպասենք Թուրքիայում սահմանադրական հանրաքվեից հետո պատրիարքարանի ընտրությունների անցկացման ամսաթվի նշանակմանը: