Հայտնի լեզվաբանի ամուսնու սպանության գործով պաշտպանական կողմը բացարկ հայտնեց մեղադրող դատախազին. որոշումը կհրապարակվի հաջորդ դատական նիստին
Էրեբունի և Նուբարաշեն վարչական շրջանների ընդհանուր իրավասության դատարանում մեկնարկեց հայտնի լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության գործով դատական նիստը՝ դատավոր Աննա Դանիբեկյանի նախագահությամբ:
Այսօրվա դատական նիստին դատավորին բացարկ հայտնելուց և մերժում ստանալուց հետո պաշտպանական կողմը բացարկ հայտնեց նաև մեղադրող դատախազներից Վարդգես Սարգսյանին, ով նախաքննության ընթացքում սպանության գործի նկատմամբ դատավարական հսկողություն էր կատարել:
Ամբաստանյալներից Արտաշես Չիչոյանի պաշտպան Միհրան Պողոսյանը ներկայացնելով բացարկի միջնորդությունը, ասաց, որ դատախազը հաշվի չի առել իր պաշտպանյալի առողջական խնդիրները.«Քննչական մարմինը Արտաշես Չիչոյանի հոգեկան խիստ հուզմունքի վիճակում գտնվելու հանգամանքը հերքել է միայն նրանով, որ Արտաշես Չիչոյանը վարորդական իրավունք ունի, որը ստացել է տարիներ առաջ»:
Բացի այդ, պաշտպանը նշեց, որ քննչակա մարմինը չի տվել այն հարցի պատասխանը, թե հատկապես որ հարվածից հետո է Եղիշե Խաչատրյանը կորցրել ինքնապաշտպանվելու կարողությունը, ինչը, պաշտպանի խոսքով՝ շատ կարևոր է:
Բացարկի միջնորդությանը միացան նաև մյուս ամբաստանյալների պաշտպանները, նշելով, որ դատախազի գործողություններում կանխակալ վերաբերմունք կա:
Տուժողի իրավահաջորդ Փառանձեմ Մեյթիխանյանն ու տուժողի իրավահաջորդի ներակայացուցիչ Ինեսսա Պետրոսյանը պաշտպանական կողմի միջնորդությունն անհիմն որակեցին:
Մեղադրող մյուս դատախազը՝ Ռաֆայել Երիցյանն իր առարկությունը հայտնեց բացարկի միջորդության վերաբերյալ: Միևնույն կարծիքն ուներ նաև դատախազ Վարդգես Սարգսյանը:
Դատարանը դատախազի դեմ ներկայացված բացարկի վերաբերյալ միջնորդության վերաբերյալ որոշումը կհրապարակի հաջորդ դատական նիստին, որը տեղի կունենա մարտի 3-ին:
Հիշեցնենք, որ հունիսի 4-ին, ժամը 23-ին, «Ֆորդ Տրանզիտ» մակնիշի ավտոմեքենայի վարորդ, 1958 թ. ծնված Եղիշե Խաչատրյանի և ճանապարհատրանսպորտային երթևեկության կանոնները խախտած ավտոմեքենայի վարորդի և ուղևորների միջև Նուբարաշենի խճուղու թիվ 1/5 հասցեի մոտ տեղի էր ունեցել վիճաբանություն, որի ընթացքում 75-ամյա մոր ներկայությամբ Եղիշե Խաչատրյանին հասցրել էին մարմնական վնասվածքներ, ինչի հետևանքով վերջինս մահացել էր:
Գործով կալանավորված են Երևանի Էրեբունի փողոցի բնակիչներ Արտաշես Չիչոյանը, Յուրի Հակոբյանը, Խաչիկ Կոսյանը, Արարատ Նիկողոսյանը և Արթուր Զաքարյանը: Վեցերորդ անձը որոնվում է: