ԻՊ-ին կից լրատվամիջոցը հայտնել է, որ Էլ Բաբում անհայտ կորած երկու թուրք զինծառայողներն առևանգվել են ԻՊ-ի կողմից
«Իսլամական պետություն» ահաբեկչական խմբավորմանը կից AMAQ լրատվական կայքը հայտնել է, որ սիրիական Էլ Բաբ շրջանում անհայտ կորած երկու թուրք զինծառայողներն առևանգվել են խմբավորման գրոհայինների կողմից:
Հիշեցնենք, որ նախօրեին թուրքական ռազմական գերատեսչությունը հայտարարել է, որ թուրքական ԶՈւ-ի կողմից Սիրիայի հյուսիսային շրջաններում իրականացվող «Եփրատի վահան» գործողությանը մասնակցող 2 թուրք զինվորական կապի դուրս չի գալիս:
«Մոտ 15:30-ին (16:30` երևանյան ժամանակով) ընդհատվել է մեր երկու մարտական ընկերների հետ կապը, որոնք մասնակցում են «Եփրատի վահան» գործողությանը, նրանց որոնումները շարունակվում են», - ասվում է պաշտոնական հաղորդագրության մեջ:
Նշենք, որ թուրքական հատուկ նշանակության ուժերն օգոստոսի 24-ի առավոտյան մտել են Սիրիայի տարածք՝ իրենց իսկ խոսքով՝ «Իսլամական պետություն» խմբավորման գրոհայիններից հյուսիսային Ջերաբլուս քաղաքի ազատագրման գործողության շրջանակում: Թուրքական ԶՈւ-ին աջակցում են նաև «Սիրիական ազատ բանակ» ընդդիմադիր խմբավորումն ու կոալիցիոն ուժերը՝ օդային հարվածների միջոցով: Թուրքական ԶՈՒ-ն պայքարում է նաև Սիրիայի հյուսիսում գործող քրդական ազգային խմբավորումների դեմ։