Երևանում ընդունված ՀԱՊԿ ռազմավարությունը չի ազդում մեզ վրա․ Հարավային Կովկասում ՆԱՏՕ-ի գրասենյակի ղեկավար
Հարավային Կովկասում ՆԱՏՕ-ի կապի գրասենյակի ղեկավար, դեսպան Ուիլյամ Լահյուն չի ցանկանում ենթադրություններ անել Հայաստանի մտադրությունների մասին՝ կապված հոկտեմբերին Երևանում ընդունված ՀԱՊԿ երկրների ռազմավարությանը Հայաստանի մասնակցության վերաբերյալ: «Ես չեմ կարող ասել, թե Հայաստանն ինչ է ցանկանում անել»,- ասաց նա:
Tert.am-ի դիտարկմանը, թե Հայաստանում փորձագիտական շրջանակներ այն համարում են պատասխան Վարշավայում ընդունված ՆԱՏՕ-ի կոմյունիկեին, նա պատասխանեց․ «Ես կարող եմ ասել, որ Հայաստանն ամուր գործընկերային հարաբերություններ է ստեղծել ՆԱՏՕ-ի հետ, և այդ գործընկերությունը շարունակվում է: Մենք ուրբաթ օրը քննարկեցինք ՆԱՏՕ-ի Անհատական գործողությունների ծրագիրը, և ես ոչ մի անհանգստություն չունեմ Հայաստանի և ՆԱՏՕ-ի միջև եղած ամուր գործընկերության վերաբերյալ»:
Ուիլյամ Լահյուն նաև նշեց, որ Հայաստանի գործն է որոշել, թե ում հետ պետք է իր հարաբերությունները կառուցի․ «Դա անհատական է յուրաքանչյուր ազգի համար: ՆԱՏՕ-ի ուժեղ արժեքներից է, որ յուրաքանչյուր սուվերեն երկիր իրավունք ունի իր սեփական որոշումն ընդունելու, թե ինչպես կառուցի իր հարաբերությունները»:
Հարավային Կովկասում ՆԱՏՕ-ի գրասենյակի ղեկավարն ընդգծեց, որ չի կարծում, որ Երևանում ընդունված ՀԱՊԿ-ի ռազմավարական ծրագիրը պատասխանն է Վարշավայում ընդունված ՆԱՏՕ-ի կոմյունիկեին: Նշեց, որ մրցույթ չէ, և կարծում է, որ ՀԱՊԿ-ի ռազմավարությունը նրա անդամ երկրներինն է և կառուցի քաղաքականությունը: «Ես չեմ կարող ենթադրել, որ այն պատասխան է Վարշավայում ընդունված ՆԱՏՕ-ի կոմյունիկեին, այն չի ազդում մեզ վրա»,֊ ասաց նա: