Մխիթարյանի իրավիճակը Մանչեսթեր Յունայթեդում. Armsport.am-ի անդրադարձը
Անգլիական «Մանչեսթեր Յունայթեդի» և Հայաստանի ազգային հավաքականի կիսապաշտպան Հենրիխ Մխիթարյանի շուրջ ստեղծված իրավիճակը շարունակում է անհանգստության մեջ պահել վերջինիս երկրպագուներին:
Armsport.am-ի լրագրողները վերլուծել են Մխիթարյանի բավարար խաղաժամանակ չստանալու պատճառները:
Հենրիխի շուրջ ստեղծված իրավիճակը չի մտնում ոչ մի տրաբանության մեջ: Ակումբը հսկայական գումար է վճարել նրա տեղափոխության համար: Համաձայն չեմ այն տեսակետի հետ, որ Մխիթարյանի տրանսֆերը նախատեսել էր նախորդ մարզիչ Լուի վան Գալը և Մոուրինյուն ստիպված է համաձայնվել դրան:
Պորտուգալացի մասնագետն այն մարդկանցից չէ, որ համակերպվի իրեն դուր չեկող իրադրության հետ, հատկապես տրանսֆերների հարցում: Մոուրինյուն հստակ գիտեր, թե ինչպիսի ֆուտբոլիստի էր ձեռք բերում և վստահ եմ, որ Մխիթարյանը պետք է նրան:
Կարծիք կա, որ Մոուրինյուն Հենրիխին պահում է որպես հաղթաթուղթ մրցաշրջանի երկրորդ հատվածի համար, երբ Անգլիայի առաջնության երկրորդ հատվածում թիմերն այնքան էլ թարմ տեսք չունեն: Այդ դեպքում, ինչու նա Հայաստանի հավաքականի ավագին չի ընդգրկում թիմի հայտացուցակում ու խաղերի վերջնամասում դաշտ դուրս չի բերում` նրան հնարավորություն տալու հարմարվել նոր առաջնությանը:
Օրեր առաջ բրիտանական մամուլը ևս մեկ վարկած էր առաջ քաշել` Մոուրինյուն ցանկանում է կիսապաշտպանության գծում տեսնել միայն ֆիզիկապես շատ ուժեղ ֆուտբոլիստների, իսկ Մխիթարյանը չի համապատասխանում այդ պահանջին: Այդ դեպքում, ինչպես է նա խաղալու հնարավորություն տալիս Խուան Մատային և Ջեսի Լինգարդին, ովքեր, համաձայնեք, այդ առումով ոչ մի կերպ չեն գերազանցում Հենրիխին:
Ակնհայտ է, որ ցանկացած ֆուտբոլիստի հնարավորություն է պետք տալ թիմին, նոր առաջնությանը հարմարվելու համար: Այդ մասին մեզնից շատ ավելի լավ գիտի նաև փորձառու Մոուրինյուն: Այդ դեպքում եթե Հենրիխ Մխիթարյանի տեղափոխությունը կայացել է Մոուրինյուի ցանկությամբ, խնդիրը նրա ֆիզիկական տվյալների մեջ չէ, մեկ խաղից հետո Մխիթարյանից հիասթափվելու տարբերակը, ինչպես նաև կիսապաշտպանի` մարզումներին չնվիրվելու հնարավորությունը բացառենք, ապա ավելի ենք խճճվում: Կարծում եմ` այդ հարցի պատասխանը գիտի միայն Ժոզե Մոուրինյուն:
Գևորգ Հակոբյան
Մխիթարյանի շուրջ իրավիճակն այնպիսին է, որ միջազգային մամուլն անընդհատ առիթը բաց չի թողնում թեժացնել այն: Ընդհանրացնելով ամենը` այո, ինչ-որ բան այն չէ, սակայն մի՞թե դա բավարար է Հենրիխի տրանսֆերը չկայացած համարել, թերևս ոչ:
«Մանչեսթեր Յունայթեդում» ամեն ինչ միանշանակ չէ, թիմը, մեծ հաշվով, կազմավորվել է մրցաշրջանի սկզբում, չկա հստակ մեխանիզմ, որպեսզի ասենք Մխիթարյանը դրա մեջ մտնում է, թե ոչ: Մեր հավաքականի ավագի հետ կապվածը միգուցե անգլիական գրանդում ծավալվող բնական խմորումների մի մաս է:
Միայն ժամանակը ցույց կտա, թե Մոուրինյուն որքանով կհստակեցնի ամենը, սակայն կարելի է ենթադրել, որ խնդիրների հստակեցումով կհարթվի նաև Մխիթարյանի հարցը: Իհարկե, հանդիպումներին չմասնակցելը լուրջ խնդիր է, սակայն այդ ընթացքը բավարար չէ միանշանակ գնահատական տալու համար:
Արման Առաքելյան
Հայաստանի ազգային հավաքականի առաջատարը ներկա պահին գտնվում է մեզ համար տարօրինակ, իսկ իր համար սովորական իրավիճակում:
Չեմ կարծում, որ պորտուգալացի մասնագետը հենց այնպես է ձեռք բերել Մխիթարյանի տրանսֆերը և գտնում եմ, որ վերջինս կմնա և կհարմարվի «Մանչեսթեր Յունայթեդում»:
Մոուրինյուն հետաքրքիր փիլիսոփայություն ունի: Ըստ իս՝ պորտուգալացին ցանկանում է այսկերպ հասկացնել Հենրիխին հետևյալը, որ ոչ ոք, որքան էլ փայլուն անցյալ ունենա, չի կարող հենց այնպես տեղ գտնել մանչեսթերյան ակումբի հիմնական կազմում: Նա պետք է քրտնաջան աշխատանք կատարի և ապացուցի, որ պատրաստ է հարյուր տոկոսով: Կարծիքիս հիմքում Մոուրինյուի խոսքերն են:
Ժոզեն Մխիթարյանի տրանսֆերը գնելուց առաջ «կարմիր սատանաների» պաշտոնական կայքին տված հարցազրույցում նշել էր, որ Հենրիխը ֆանտաստիկ ֆուտբոլիստ է և նախորդ մրցաշրջանի վիճակագրությունը հաստատում է այդ ամենը: Կապրենք, կտեսնենք: Եթե տեղի ունենա հակառակը, ուրեմն Մոուրինյուն փայլուն դերասան է և ստախոս:
Գևորգ Մարտիրոսյան
Մխիթարյանի` «Մանչեսթեր Յունայթեդ» տեղափոխվելու փաստին թերահավատորեն արձագանքեցին նրա երկրպագուներից շատերը: Անգլիական գրանդի երկրպագուների մոտ առկա էր լավատեսական սպասում, իսկ Դորտմունդի «Բորուսիայի» երկրպագուների և ղեկավարության կարծիքն այդ տեղափոխության մասին ակնհայտ էր. գերմանական ակումբը չէր ցանկանում բաց թողնել իր առաջատարին: Այո, Մխիթարյանը արդեն հարմարվել էր «Բորուսիային» ու գերմանական ֆուտբոլին և Բունդեսլիգայում լավագույնը ճանաչված հայ ֆուտբոլիստի որոշումը կարելի է համարել համարձակ:
Շատերի կարծիքով գերմանական ֆուտբոլը այնքան է տաբերվում անգլիականից, որքան ֆուտբոլը՝ ռեգբիից: Այո, ֆուտբոլը Անգլիայում և Գերմանիայում տարբեր է ու հարմարվելու համար ժամանակ է պետք, բայց Մխիթարյանի խաղամակարդակի և նրա հավակնություններով ֆուտբոլիստի համար այդ ամենը մեծ խնդիր չէ:
Ինչպես վերջին ասուլիսներից մեկում նշեց «Մանչեսթեր Յունայթեդի» գլխավոր մարզիչ Ժոզե Մոուրինյուն. «Որոշ ֆուտբոլիստներ արագ են հարմարվում, որոշներին ավելի շատ ժամանակ է անհրաժեշտ: Ինչու Մխիթարյանը չի հայտնվում հայտացուցակում: Դևիդ Մոյեսի և Վան Գալի օրինակներից հետո պարզ դարձավ, որ «Մանչեսթեր Յունայթեդի» նման գրանդ ակումբում մեծ փոփոխությունները դրական արդյունքի չեն բերում:
Կարծես թե, Մոուրինյուն շարժվում է հենց այս սխեմայով, չի գնում կտրուկ փոփոխությունների, ակումբի խաղային ձեռագրի մեծ փոփոխության: Մխիթարյանն անկասկած է պետք է «Մանչեսթեր Յունայթեդին», բայց պետք է նաև հաշվի առնել, որ մանչեսթերյան թիմում մեկնարկային կազմի ընտրությունը շատ մեծ է, այս թիմն իր աստղային կազմով հիշեցնում 2000-ականների «Ռեալը»` իր «գալակտիկոսով», ներկայիս դրությամբ միայն Դավիդ դե Խեայի և Զլատան Իբրահիմովիչի տեղերն են մեկնարկային կազմում ապահոված:
Կարելի է կանխատեսել, որ «Մխիթարյանը ժամանակը» կսկվի հենց առաջիկա խաղից. Պրեմիեր լիգայի 12-րդ տուրում «Մանչեսթեր Յունայթեդն» ընդունելու է «Արսենալին»:
Մխիթարյանը թարմություն կհաղորդի թիմին նաև «Boxing day»-ի ժամանակ, երբ Պրեմիեր լիգայի թիմերը խիտ խաղացուցակի պատճառով կադրային խնդիրներ են ունենում: Ավանդաբար, հենց այն թիմերն են հայտնվում «մեծ քառյակում», որոնք «Boxing day»-ի շրջանում քիչ միավորներ են կորցրել: Այո, Մխիթարյանը անբացատրելի պատճառներով մի քանի խաղ չհայտնվեց թիմի հայտացուցակում, սակայն չմոռանանք նաև Մոուրինյուի անբացատրելի փիլիսոփայության մասին: Մոուրինյուին և կանանց հնարավոր չէ հասկանալ: Միգուցե պորտուգալացի մասնագետը չէր ցանկանում, որ Մխիթարյանը կիսով չափ պատրաստ լինելով տեղ զբաղեցնի պահեստայինների նստարանին և զգա իրեն պահեստային ֆուտբոլիստ: Կամ մոտիվացնում էր առաջնության երկրորդ հատվածում որպես «հաղթաթուղթ» (ջոկեր) օգտագործելու համար:
Հայաստանի հավաքականի կազմում անցկացրած ամբողջական հանդիպումը որոշ չափով լուծեց Մխիթարյանի խաղային պրակտիկայի խնդիրը և կարելի է սպասել, որ հայ ֆուտբոլիստը առաջիկայում կփայլի «Մանչեսթեր Յունայթեդում»: Վերջին ասուլիսներից մեկում, Մոուրինյուն անդրադառնալով Մխիթարյանի բացակայությանն ասել էր. «Ուշ թե շուտ ոչ մի խնդիր չի լինի», ամենայն հավանականությամբ պորտուգալացի մասնագետը չի սխալվում:
Տիգրան Կարապետյան