Օնլայն ռեժիմով կերևա, թե որքան միջոցներ են մուտք եղել հիմնադրամ. ԿԲ պաշտոնյան 1000-ական դրամների վճարման մասին
Կենտրոնական բանկի ֆինանսական համակարգի կարգավորման վարչության պետ Մհեր Աբրահամյանը Tert.am-ի հետ զրույցում անդրադարձել է Զինծառայության ընթացքում մահացած զինծառայողների ընտանիքի անդամներին և հաշմանդամություն ձեռք բերած զինվորներին ապահովագրական գումարներ վճարելու հիմնադրամի թափանցիկության ապահովման հարցին: Նա նախ նշեց, որ երկու հիմնական կոմպոնենտ կա միջոցների ձևավորման համար. առաջինն այն է, որ յուրաքանչյուր քաղաքացի ամսական հազար դրամ կփոխանցի, երկրորդը՝ կամավորության սկզբունքի հիման վրա ցանկացողները կարող են միանվագ գումարներ նվիրաբերել, կամ՝ ամսական վճարել ոչ թե հազար դրամ, այլ ավելի շատ:
«Հիմնական աղբյուրը այս գումարներն են լինելու և այս կուտակված միջոցների կառավարումից ստացվող լրացուցիչ եկամուտները, որոնք նույնպես մեծ տեսակարար կշիռ են կազմելու, քանի որ այն երկարաժամկետ հիմնադրամ է և ժամանակի ընթացքում տոկոսների արդյունքում հնարավորություն է ընձեռվելու շատ ավելի մեծ գումարների հատուցում տրամադրել»,- ասաց նա:
Նշենք, որ Կառավարության նիստին ՀՀ Պաշտպանության նախարար Վիգեն Սարգսյանը ներկայացրել էր փաթեթ, որի համաձայն՝ կհիմնվի հիմնադրամ, որում գումարները կգոյանան աշխատավարձերից ստացած 1000-ական դրամների հաշվին, իսկ բոլոր նրանք, ովքեր ցանկություն ունեն փոխանցել ավելին, նման հնարավորություն ունեն: Հատուցման գումարների վճարումն իրականացնելու, այն կառավարելու համար առաջարկվում է ստեղծել հատուկ կառույց, որը կմիավորի և՛ պետությունից, և՛ հասարակությունից ստացվող դրամական միջոցները: Խորհրդում ներկայացված են լինելու երեքական ներկայացուցիչներ Կենտրոնական բանկից, Կառավարությունից ու քաղաքացիական հասարակությունից:
Ինչ վերաբերում է թափանցիկության ապահովմանը, Մհեր Աբրահամյանն ասաց. «Դա ամենակարևոր կոմպոնենտն է համակարգի կայացման և հաջողության համար, դրա համար մեխանիզմը շատ պարզ է արված՝ հազար դրամ յուրաքանչյուր քաղաքացուց, և ոչ թե եկամուտից կախված տոկոսային գումար է սահմանված: Բացի դրանից՝ հատուցման գումարները նույնպես նախապես որոշված են»,- ասաց նա:
Մհեր Աբրահամյանը նշեց, որ ստեղծվող մարմինն անկախ պրոֆեսիոնալ հիմնադրամ է լինելու, որը միայն այս գործառույթով է զբաղվելու. հիմնական խնդիրը լինելու է գումարները հավաքագրումը, դրանց կառավարումն հատուցումների իրականացումը:
«Թափանցիկության համար պետք է անել մաքսիմալ հնարավորը, նախատեսում ենք, որ օնլայն ռեժիմով ցանկացած պահի ցանկացած մարդ կարողանա տեսնել, թե այդ հիմնադրամ որքան միջոցներ են մուտք եղել, այդ թվում՝ կամավորների վճարների արդյունքում, կառավարումից որքան գումարներ են ստացվել, որքան փաստացի հատուցում է եղել զոհվածի ընտանիքին, հաշմանդամություն ունեցողներին: Այս ամենը մաքսիմալ թափանցիկ է լինելու»,-ասաց ԿԲ պաշտոնյան և նշեց, որ օրենքով պարտադիր պայման կա, որ հիմնադրամն արտաքին աուդիտի պետք է ենթարկվի յուրաքանչյուր տարի:
Մհեր Աբրահամյանը հնարավոր համարեց նաև, որ եթե, օրինակ, նվիրատվություն կատարող անձը ցանկանում է, որ իր անունը բացահայտվի, ապա անուն առ անուն կարող են նշել, թե յուրաքանչյուրը որքան հատկացում է կատարել հիմնադրամին, բայց եթե նվիրատուն չցանկանա իր անունը հրապարակել, ապա անունը չի երևա, սակայն կերևա, թե որքան գումար է հատկացվել: