Մենք պարզապես քաղաքական գործիչներ ենք, ոչ մի հանցանք թույլ չենք տվել. Կարո Փայլանն իր կուսակիցների ձերբակալության մասին
Պարզապես քաղաքական օպերացիա էր, որին աջակցեց Թուրքիայի արդարադատության համակարգը․ Tert.am-ի հետ զրույցում, խոսելով թուրքական իշխանությունների կողմից քրդամետ Ժողովրդադեմոկրատական կուսակցության նկատմամբ սկսված հետապնդումների մասին, ասաց Թուրքիայի խորհրդարանի ստամբուլահայ պատգամավոր Կարո Փայլանը:
«Մենք պարզապես քաղաքական գործիչներ ենք, ոչ մի հանցանք թույլ չենք տվել: Մենք բացում ենք քաղաքական համակարգը»,- ասաց նա՝ նկատելով, որ դրան ի պատասխան, երկրի իշխանությունները խոչընդոտում են նրանց աշխատանքը:
Ստամբուլահայ պատգամավորի խոսքով՝ չնայած երկրի դատական համակարգն անընդհատ նշում է, թե անկախ է, սակայն ամբողջովին կատարում է իշխանությունների ցանկությունները:
Ստամբուլահայ պատգամավորը մատնանշեց այն հանգամանքը, որ իր կուսակիցները ձերբակալվեցին նույն պահին, իսկ դա, ըստ նրա, ևս մեկ ապացույց է, որ հետապնդողները կատարում էին վերևից տրված հրահանգ:
Անդրադառնալով տարածված հայտարարությանը, ըստ որի Ժողովրդադեմոկրատական կուսակցությունը դադարեցնում է Խորհրդարանում իր աշխատանքը, նա նշեց, որ իրականում ինքն ու իր կուսակիցները շարունակելու են աշխատել որպես պատգամավորներ: «Մինչև երեկ խորհրդարանում էի: Պատճառն այն է, որ խորհրդարանը լիովին չի աշխատում: Էրդողանը չի ցանկանում կորցնել իր իշխանությունը, վերահսկողությունը խորհրդարանի և արդարադատության համակարգի վրա: Հենց նա է ղեկավարում խորհրդարանը, և այդպիսով չարաշահում է իր դերը. խորհրդարանում չկա ոչ բանավեճ, ոչ էլ քննարկումներ: Անգամ իշխող կուսակցության անդամները չգիտեն՝ ինչպես իրենց պահել խորհրդարանում, նրանք հենց այնպես գնում են խորհրդարան», - ասաց Կարո Փայլանը՝ հավելելով, իրենց ցանկությունն էլ այն է, որ խորհրդարանը գործի, բայց, ինչպես ինքը նշեց, դրա համար իրենք ձերբակալվում են:
Նրա խոսքով՝ հիմա իրենք պարզապես պետք է դուրս գան խորհրդարանից, գնան իրենց ընտրողների մոտ՝ հարցնելու, թե ինչ պետք է անեն:
Ստամբուլահայ պատգամավորն ընդգծեց, որ իր կուսակիցների ձերբակալությունները 1915 թվականի Հայոց ցեղասպանության օրերն են հիշեցնում. «Անկարայից մեր երեք պատգամավորները ձերբակալվել են, շրջանների ղեկավարներ ևս: Մենք լոկալ դեմոկրատիայի անհրաժեշտություն ունենք: Մենք խորհրդարանում չունենք Թուրքիայի բոլոր խավերը ներկայացնող մարդիկ»,- ասաց նա:
Ըստ Կարո Փայլանի՝ պետք է պարզաբանվի՝ արդյոք Թուրքիայի խորհրդարանը կարո՞ղ է լինել հայերի կամ քրդերի կուսակցություն, թե՞ այն միայն թուրք ազգայնական կուսակցություններինն է․«Այս հարցին պետք է պատասխանեն բոլորը՝ բոլոր թուրքական կուսակցությունները»:
Դիտարկմանը, որ Ժողովրդահանրապետական կուսակցության առաջնորդը մեղադրել է թուրքական իշխանություններին՝ Ժողովրդադեմոկրատական կուսակցության պատգամավորներին ձերբակալելու մեջ, Կարո Փայլանը պատասխանեց. «Այո, իսկապես նրանք երկրի կառավարությանը մեղադրել են այդ հարցում, բայց միանշանակ չի կարելի ասել, որ պաշտպանելու են դեմոկրատներին։ Էրդողանը միշտ նրանց հարցրել է՝ արդյոք իրենց կողմնակի՞ցն են: Պետք է նկատել, որ նրանք ազգայնական արմատներ ունեցող թուրքական կուսակցություն են: Նրանք չեն կարող հետևել դեմոկրատներին: Ճիշտ է, ասում են, որ սոցիալ դեմոկրատներ են, բայց նրանք ազգայնական քաղաքականության հետևողներ են, ինչպե՞ս կարող են պաշտպանել քրդերի կամ հայերի շահերը»,- ասաց Փայլանը:
Ստամբուլահայ պատգամավորը, խոսելով արդեն իրեն սպառնացող վտանգի մասին, ասաց. «Ես ինձ անվտանգ վայրում չեմ զգում: Բոլորը՝ հայերը, քրդերը գիտեն, որ Թուրքիան վարում է ազգայնական քաղաքականություն»:
Նա նշեց, որ երկրում դեմոկրատիայի առկայության դեպքում իրեն անվտանգ կզգար: «Իհարկե, հնարավոր է, որ և՛ իմ ինքնության, և՛ քաղաքական գործիչ լինելու պատճառով ես հալածվեմ: Բոլորս էլ գիտենք, որ Թուրքայի ազգայնական քաղաքականության պատճառով ոչ ոք պաշտպանված իրեն չի զգում: Թուրքիայում մի հատված կա, որն իր ազգայնական քաղաքականությունն առաջ տանելու համար օգտագործում է ամեն ինչ․ դրանք ազգայնականներ են, ուլտրաազգայնականներ են, ԱԶԿ-ի հետևորդներ»,- ասաց Կարո Փայլանը՝ նշելով, որ նրանց գործողությունները տարբեր ժամանակներում նույն նպատակին են ծառայել՝ հետապնդել փոքրամասնություններին, մեդիայի գործիչներին. «Այնպես որ ես այս հարցում միայնակ չեմ, ես պարզապես փորձում եմ պայքարել»,- եզրափակեց ստամբուլահայ պատգամավորը: