Սամվել Բալասանյանն այժմ փորձում է նախընտրական ժամանակահատվածում շաղ տված փողերը հավաքել. Արմենուհի Վարդանյան
Գյումրու քաղաքապետ Սամվել Բալասանյանը շարունակում է ապօրինի գործողություններ կատարել, ընտրություններից հետո իր աշխատաոճը չի փոխել։ Tert.am-ի հետ զրուցում այս մասին ասաց «ԳԱԼԱ» կուսակցության վարչության անդամ Արմենուհի Վարդանյանը։
Ըստ նրա՝ գյումրեցիները Գյումրիում փոփոխությունների, բարեփոխումների ականատեսը չեն դառնում:
«Երեկ էլ ավագանու նիստին՝ քվորումի բացակայության պայմաններում որոշումներ են ընդունել: Ավագանու նիստն արդեն կեսից իրավազոր չէր, քանի որ նիստին ներկա չէին որոշում ընդունելու համար անհրաժեշտ թվով ավագանու անդամներ: «Բալասանյան դաշինքը» ներկայացնող Վահան Հունանյանը կեսից լքեց ավագանու նիստը, սակայն դա ամենևին չխանգարեց, որ նիստը «բնականոն հունով» շարունակվի, ավելին` որոշումներ դրվեն ավագանու հաստատմանը, նրանք էլ 16 հոգով ինքնագոհ քվեարկեն և համարեն, որ որոշումներն ընդունված են: Իրենք դեռևս չեն ադապտացվել նոր իրադրությանը, որ անգամ մեկ հոգու բացակայությունը իրավիճակ է փոխում: Ավագանու նիստն անմիջապես պետք է ընդմիջվեր, 33 հոգուց, եթե 16-ն է ներկա՝ քաղաքապետն էլ հետը, ո՞նց են որոշում ընդունում: Սա բացահայտ ապօրինություն է»,- նշեց կուսակցության լրատվության և հասարակայնության հետ կապերի պատասխանատուն:
Արմենուհի Վարդանյանը հիշեցրեց, որ ավագանու նիստերին մասնակցել են միայն «Բալասանյան» դաշինքի 17 անդամները: Ավագանու նիստերը բոյկոտել են երեք քաղաքական ուժերը՝ «Բարգավաճ Հայաստան», «Հայկական վերածնունդ» և ԳԱԼԱ կուսակցությունները:
Արմենուհի Վարդանյանը նաև կարծիք հայտնեց, որ Սամվել Բալասանյանն այժմ փորձում է նախընտրական ժամանակահատվածում «շաղ տված փողերը հավաքել»՝ մանրամասնելով, որ արդեն տևական ժամանակ Գյումրու քաղաքապետարանը փաստացի սուբսիդավորում է Գյումրիում գործող բաղնիքներից մեկը: Խոսքը բաղնիքի և վարսահարդարման ծառայություններ մատուցող ընկերությունը «Պլատֆորմ» ՍՊԸ-ն է, որին տեղական բյուջեից որոշվել է վճարել 5 մլն դրամ, սոցիալական որոշ խմբերի տրվելու է դրանից օգտվելու հնարավորություն՝ տնակային պայմաններում ապրող շուրջ 1920 շահառուի:
«Լավ է, որ այդպիսի հնարավորություն է տրվում սոցիալապես անապահով անձանց, հարցն այն է, թե ինչու է գործընթացը տեղի ունենում առանց մրցույթ հայտարարելու: Բացի դրանից՝ ինչպե՞ս է որոշվել, որ գյումրեցին հենց բաղնիքի կարիք ունի, դա է գերակա շահը... Սա էլ է հարց: Հիշյալ ՍՊԸ-ն գրանցված է Բալասանյանի նախկին և գուցե ներկա խորհրդական Սահակ Սահրադյանի անունով, Բալասանյան Սամվելի մտերիմն է այս անձնավորությունը: Այնպես որ, թե ուր է գնում 5 մլն-ը, դրանից առաջ էլի միլիոնավոր դրամներ՝ պարզից էլ պարզ է, որ հետքերը տանում են դեպի Բալասանյան: Իրենք իրենց որոշել են պարգևատրել: Գյումրեցու գրպանից հանում են գումարը և տանում իրենց գրպանը»,- ընդգծեց Արմենուհի Վարդանյանը:
Հարցին՝ արդյո՞ք իրականությանը մոտ համարում են այն խոսակցությունները, թե խորհրդարանական ընտրություններից հետո Սամվել Բալասանյանը հրաժարական կտա, իշխանությունները նրան չեն պահի քաղաքապետի պաշտոնում։ Արմենուհի Վարդանյանը նշեց, որ միայն մամուլում է այպիսի վարկած կարդացել, սակայն Գյումրիում դեռ խոսակցություններ չկան։
«Այս պահին քիչ հավանական եմ համարում, որ Բալասանյանին կստիպեն հրաժարական տալ: Դրանից առաջ պետք է գտնեն մեկին, ով հավատարմության երդում կտա ռեժիմին, որ խորհրդարանական ընտրություններին ձայն կապահովի ՀՀԿ-ին, և այդ մեկին, հիշեցնեմ, որ պետք է ընտրի ավագանին: Այնպես չէ, որ Բալասանյանի համար առաջիկա խորհրդարանական ընտրությունները հեշտ լուծելի խնդիր է: Անգամ փոփոխված անունով՝ «Բալասանյան դաշինքի» անվան տակ ծվարած՝ ՀՀԿ-ն արժանացավ 14.000 քվեի»,-ասաց նա: