Այս Կառավարությունը 6 ամսից ավելի երկար գործելու դեպքում կապահովի ոչ թե 3.2%, այլ երկնիշ թվով տնտեսական աճ. տնտեսագետ
Տնտեսագետ Թաթուլ Մանասերյանն այսօր Tert.am-ի հետ զրույցում անդրադարձավ «ՀՀ 2017 թ. պետական բյուջեի մասին» ՀՀ օրենքի նախագծին, որն այսօր Ազգային ժողովի մշտական հանձնաժողովների համատեղ նիստում ներկայացրել է վարչապետ Կարեն Կարապետյանը: Տնտեսագետն առաջնահերթ կարևորեց, որ բյուջեն արտացոլի կառավարության ծրագրի հիմնադրույթները՝ խնայողությունների, կրճատումների, պարգևատրումների, պետական ապարատի ծախսերի և այլնի վերաբերյալ:
«Ես կարող եմ ասել, որ սա այն բացառիկ բյուջեներից է, որն իրապես իր մեջ ներառում է և արտացոլում է կառավարության գործունեության ծրագիրը»,-ասաց նա և նշեց, որ դրանով այս բյուջեն տարբերվում է նաև նախորդ տարիներին ներկայացված բյուջեներից: Այս տարվա բյուջեի առանձնահատկությունը նաև այն համարեց, որ մինչև 2025 թվականի ռազմավարական զարգացման ծրագրի միջև կապ կա:
«Կարծում եմ, որ բյուջեի մեջ դրված ցուցանիշներն իրատեսական են: Բյուջեները, ըստ էության, իրենց կատարողականով պետք է գնահատվեն: Ես կարծում եմ, որ եթե Կառավարությունը գործի ոչ թե վեց ամիս, այլ ավելի շատ, ապա իրատեսական եմ համարում, որ ոչ թե միայն 3,2 տոկոս տնտեսական աճը կապահովի, այլ նաև երկնիշ թվով տնտեսական աճ կարող է ապահովել»,-ասաց նա և նկատեց, որ բյուջեում հաշվի են առնված մարտահրավերները:
Անդրադառնալով վարչապետի այն հայտարարությանը, որ բյուջեում հաշվի է առնվել նաև այն հանգամանքը, որ բիզնեսը, գործարար աշխարհը մաքսիմալ չճնշվի ու կարողանա վերարտադրվել, տնտեսագետն ասաց. «Սա խոսում է այն մասին, որ Կառավարությունը գիտակցում է, որ պետք է շատ ճկուն հարկաբյուջետային քաղաքականություն իրականացնի, հարկերը պետք է լինեն մի կողմից տանելի հատկապես փոքր բիզնեսի համար, իսկ մյուս կողմից հնարավոր լինի դրանցով համալրել բյուջեի եկամտային մասը: Այս առումով, կարծում եմ, որ կառավարությունը ճիշտ քաղաքականություն է որդեգրել և դրա իրականացման արդյունքում առաջին հերթին կխթանվի միկրոբիզնեսը»:
Նա կարևորեց ոչ միայն հետևողական լինելը, այլ նաև ծրագրերի իրականացման հարցում աջակցություն ցուցաբերելը Կառավարությանը:
Թաթուլ Մանասերյանն առանձնացրեց նաև ինքնազբաղվածությունը ապահովելուն ուղղված գործողությունները, ինչը թույլ կտա կանխել արտագաղթը, առավել ևս՝ ուղեղների արտահոսքը:
«Այս պարագայում կարծում եմ, որ գրավիչ պայմաններ կլինեն նաև արտաքին ներդրումային միջավայրի համար, թեև առաջնահերթ պետք է ապահովել ներքին ներդրումները»,-ասաց նա: