Չեմ կարծում, որ վարչապետը գազի սակագնի նվազեցման առաջարկությունն արել է՝ իմանալով, որ դրա հնարավորությունը կա. Խ. Հարությունյան
ԱԺ «Հանրապետական» խմբակցության պատգամավոր Խոսրով Հարությունյանից Tert.am–ը հետաքրքրվել է, թե ինչպե՞ս ստացվեց, որ հնարավոր եղավ գազի սակագինը վերանայել հատուկ խմբերի համար, մինչդեռ ԱԺ-ում ստեղծված ՀՀ գազամատակարարման ոլորտն ուսումնասիրող ԱԺ ժամանակավոր հանձնաժողովը եզրակացությամբ նշեց, թե հնարավոր չէ:
Հիշեցնենք, որ Խոսրով Հարությունյանը ՀՀ գազամատակարարման ոլորտն ուսումնասիրող ԱԺ ժամանակավոր հանձնաժողովի նախագահն էր: Նշենք, նաև, որ Հանրային ծառայությունները կարգավորող հանձնաժողովի ղեկավար Ռոբերտ Նազարյանը հայտարարել էր, որ կնվազի գազի և էլեկտրաէներգիայի սակագները անապահով քաղաքացիների և բիզնեսը խթանող երկու ճյուղերի՝ գյուղատնտեսություն, ջերմոցային տնտեսություն վարողների համար:
«Ամբողջ հարցը կայանում է նրանում, որ Կառավարությունը չի առաջարկում վերանայել սակագինը՝ հաշվի առնելով այն հանգամանքը, որ կարող է դուք սխալ եք սահմանել: Ինքը Հանրային ծառայությունները կարգավորող հանձնաժողովին ասում է օրենքով ձեզ վերապահված իրավասության շրջանակներում քննարկեք սոցիալապես խոցելի խավերի համար համեմատաբար ավելի մատչելի սակագին սահմանելու խնդիրը, որից հետո երբ որ դա ձեր մոտ կառաջանա, անկասկած «Գազպրոմ Արմենիան», Կառավարությունը և ՀԾԿՀ-ը կքննարկեն, թե այդ սակագնի սուբսիդավորման խնդիրներն ինչպես պետք է լուծեն»,- բացատրեց Խոսրով Հարությունյանը:
Ըստ նրա, եթե Կառավարությունը սակագին է իջեցնում, ուրեմն պետք է սուբսիդավորվի աբյուջեից կամ էլ «Գազպրոմ Արմենիայի» հետ համաձայնության գալով՝ իրենց շահույթների հաշվին: «Եթե կառավարությունն աջակցում է այդ նվազման գաղափարը, ուրեմն անպայման պետք է բյուջեից սուբսիդավորի: Բայց նաև հնարավոր է, որ Կառավարությունը պայմանավորվածություն է ձեռք բերել «Գազպրոմ Արմենիայի» հետ և նրանք իրենց կորպորատիվ շահույթների հաշվին դա անեն, քննարկելու հարց է»,-ասաց նա:
Խոսրով Հարությունյանի խոսքով, երբ որ հանձնաժողովը խոսում էր, թե մենք տեսնում ենք սակագնի նվազեցման հնարավորություն, իրենք փորձում էին եզրակացության գալու համար ուսումնասիրել «Գազպրոմ Արմենիայի» բոլոր ծախսերը, որոնք ձևավորում են սակագինը և առանձնահատուկ փորձում էիքն ուշադրություն դարձնել կորուստների վրա: «Կորուստերը համաձայնեք, որ եթե հնարավոր լինի նվազեցնել, դա ուղղակի բերելու է սակագնի նվազեցմանը և մեր քննարկումներն այստեղ էին, և, ցավոք, հանձնաժողովին այդքան ժամանակ չտրվեց, քանի որ ծավալուն խորը վերլուծություններ էին պահանջում, թեպետ համոզված եմ, որ այդ հարցադրումները, որ հանձնաժողովում արվել են, այսօր հրատապ են, ու կարող են դառնալ քննարկման առարկա»,-ասաց նա:
Հարցին, թե հնարավո՞ր է, որ վարչապետը ծանոթ լինելով «Գազպրոմ Արմենիայի» հնարավորություններին, որ սակագին իջեցնել հնարավոր է, դրանից ելնելով է նման առաջարկություն ներկայացրել, Խոսրով Հարությունյանը պատասխանեց. «Ճիշտն ասած մի բան մենք կարող ենք փաստել, որ վարչապետն անհամեմատ ավելի լավ է տիրապետում առարկային, քան ես և դուք: Բայց ես այն կարծիքին չեմ, որ վարչապետն առաջարկությունն արել է՝ ելնելով նրանից, որ կան սակագինը իջեցնելու հնարավորություններ, և մինչև հիմա չեն արվել: Ավելին` վարչապետն իր պատասխաններից մեկում պատասխանել է, որ ռեսուսրներ ազատ գոյություն չունեն, խոսքն ընդամենը քաղաքական որոշման մասին է, որն, անկասկած, գին ունի և պետք է այդ գինը կոմպենսացվի: Ինչպես, ժամանակը ցույց կտա ինչ լուծումներ կարող են լինել»: