Պուտինի ծննդյան օրվա առթիվ ի մի են բերվել նրա ամենազավեշտալի արտահայտությունները (տեսանյութ)
Այսօր Ռուսաստանի Դաշնության նախագահ Վլադիմիր Պուտինը նշում է ծննդյան 64-րդ տարեդարձը, ինչի կապակցությամբ vesti-ukr.com կայքն ի մի է բերել ռուս ղեկավարի կողմից տարբեր առիթներով ասած ամենազավեշտալի արտահայտությունները.
Պուտինը՝ գերմանացիներին. «Ես ընդհանրապես չեմ հասկանում՝ ինչո՞վ եք դուք տաքանալու: Մեր գազից հրաժարվում եք, ատոմային էներգետիկան չեք ուզում զարգացնել...ինչո՞վ եք տաքանալու, փայտո՞վ»:
«Ուզում եմ ասել, որ մեզ բացարձակապես չի հետաքրքրում ձեր կարծիքը և որ մենք թքած ունենք ձեզ վրա: Բայց դե լավ խորհուրդներին, իհարկե, ականջ կդնենք»:
«Բեռլուսկոնիին դատում են նրա համար, որ նա ապրում է կանանց հետ: Բայց եթե նա միասեռական լիներ, նրան ոչ ոք մատով ձեռք չէր տա»:
«Դժբախտաբար, Ռուսաստանը ժամանակակից աշխարհի մի մասն է»:
«Մենք ահաբեկիչներին հետապնդելու ենք ամենուր, կապ չունի, թե նրանք որտեղ կլինեն: Եթե մենք նրանց, ներողություն եմ խնդրում, զուգարանում բռնենք, ապա հենց այնտեղ էլ նրանց վերջը կտանք»:
«Դու պարտավոր ես օրենքին ենթարկվել միշտ, այլ ոչ թե այն ժամանակ, երբ բռնել են համապատասխան տեղիցդ»:
«Մեր հեռուստատեսությունում չափից շատ է բռնությունն ու այն, ինչն անվանում են սեքս»:
«Եթե մարդուն ամեն ինչ դուր է գալիս, ապա նա կատարյալ ապուշ է: Նորմալ հիշողություն ունեցող առողջ մարդուն չի կարող միշտ և ամեն ինչ դուր գալ»:
«Ինձնից հետաքրքրվում էին, թե երբվանից եմ սկսել սեքսով զբաղվել»,-ասել է Պուտինը՝ պատմելով 2006թ. տեղի ունեցած ինտերնետ կոնֆերանսի մասին:
«Եվ ուրեմն երբվանի՞ց»,-շտապել են հետաքրքրվել լրագրողները:
«Չեմ հիշում: Բայց հստակ հիշում եմ, թե երբ եմ դրանով զբաղվել վերջին անգամ: Նույնիսկ կարող եմ րոպեների ճշգրտությամբ ասել՝ երբ»,- մանրամասնել է ՌԴ նախագահը:
«Մենք պատրաստ ենք ձեռք մեկնել մեր բոլոր գործընկերներին, սակայն զգուշացնում ենք՝ մեր ձեռքերը երկար են»: