Եթե ԲՀԿ-ն, ԼՀ-ն ու ՀՎ-ն իրենց համարում են մեկ գաղափարական դաշտի մարդիկ և իրենց թեկնածուին ուզում են տեսնել քաղաքապետ, թող տեսնեն. Մ.Ասլանյան
Tert.am –ի հետ զրույցում Վանաձորի քաղաքապետի ՀՀԿ-ական թեկնածու Մամիկոն Ասլանյանը ներկայացրեց իր ծրագրերը և գնահատականը հոկտեմբերի 2-ի ՏՒՄ ընտրություններին մասնակցած և 2-րդ ու 3-րդ տեղերը զբաղեցրած ուժերի միավորման վերաբերյալ:
- Պարոն Ասլանյան, երեկ հետընտրական Վանաձորում բեկում մտավ, երբ Վանաձորի ավագանու ընտրություններում երկրորդ և երրորդ տեղերը զբաղեցրած «Լուսավոր Հայաստան» և «Հայկական Վերածնունդ» կուսակցությունները հայտարարեցին քաղաքապետի ընտրության հարցում «Լուսավոր Հայաստան»-ի թեկնածու Քրիստ Մարուքյանի թեկնածությունը պաշտպանելու վերաբերյալ համաձայնության մասին:
-Ես գիտեմ, որ հաղթել ենք, վանաձորցին քվե է տվել։ Վանաձորն ինձ համար միշտ մնում է փոքր հայրենիք և ոչ քաղաքական թատերաբեմ:
-Բայց ինչպե՞ս եք հաղթել, եթե այդ 3 ուժերով են հաղթում` միասին ունենալով 18 մանդատ, Ձեր քաղաքական ուժը` 15: Դուք սա համարում եք հաղթանա՞կ:?
-Հիմա 15 հազար ձայնը ուր, 11 հազարը ուր: Հաղթանակն ուրիշ բան է, հաջողություն արձանագրելն` այլ, բայց եթե մարդիկ կգտնեն, որ հաղթել են և իրենց թեկնածուին ուզում են տեսնել քաղաքապետ, թող տեսնեն:
- Բայց եթե անգամ մեկ քաղաքական ուժի հաղթել եք, երեքին միասին պարտվել եք ու Դուք չեք քաղաքապետ, համաձայնե՞ք:
- Եթե այդ երեք ուժերն իրենց համարում են գաղափարական մեկ դաշտի մարդիկ, ուրեմն Դուք ճիշտ եք:
-Եթե քաղաքապետը իրենց դաշինքային ցուցակից է առաջադրվում, Դուք՝ որպես ՀՀԿ համամասնական ցուցակի առաջին համար, կվերցնե՞ք ավագանու մանդատը, թե՞ ոչ:
-Որոշում չունեմ կայացրած, ամսի 10-ից հետո:
-Հնարավո՞ր եք համարում ինչ-որ այլ սցենար:
-Մենք ոչ մի բան չենք մեկնաբանում, քանի որ ազնիվ մեր ընտրապայքարը տարել ենք, հաղթանակ ենք արձանագրել` մեծ առավելությամբ: Հետևաբար, այսօր նենց իրավիճակ չէ, որ նման մեկնաբանություններ անենք:
-Չեք համարո՞ւմ, որ մի քիչ շտապեցիք հոկտեմբերի 3-ին գրելով, որ Ձեր հաջողությունը նվիրում եք յուրաքանչյուր վանաձորցու, առաջին հերթին այն համաքաղաքացիներին, ովքեր վստահեցին ՀՀԿ-ին ու ավելացրեցիք. «Ես սիրում ու սիրելու եմ բոլոր նրանց, ովքեր մեզ ձայն չտվեցին։ Հավատացած եղեք՝ ես տարբերակում չեմ դնելու վանաձորցիների միջև։ Ես կլինեմ բոլորիդ քաղաքապետը»:
-Ես, այո, գրել եմ, մեր հաջողությունը նվիրում եմ մեր թիմակիցներին: Իսկ հաջողությունը ընտրություններում տարած հաղթանակն էր: Իսկ որ վերջում գրել եմ`ես կլինեմ, այսինքն`կլինեմ, ապագայում:
-Որ ապագայում` հեռավո՞ր, մոտ:
-Ամեն դեպքում, «կ» տառը նշանակում է ապագա, և ես գրել եմ` կլինեմ, չեմ գրել` կամ: