Զելենսկին Բայդենին և Սի Ծինփինին խնդրել է գնալ Շվեյցարիա՝ Խաղաղության գագաթնաժողովին
Ուկրաինան չի կարող սեփական ջանքերով դադարեցնել պատերազմը և հույսը դնում է այս ամառ Շվեյցարիայում կայանալիք Խաղաղության գագաթնաժողովին աշխարհի առաջնորդների մասնակցության վրա։ Այս մասին Ուկրաինայի նախագահ Վլադիմիր Զելենսկին հայտարարել է համաշխարհային առաջնորդներին ուղղված ուղերձում, գրում է Censor.NET-ը։
«Մենք բոլորս գիտենք, թե ում հետ գործ ունենք՝ ի դեմս Ռուսաստանի: Նրանք ցանկանում են կյանքեր կործանել, քաղաքներ ու գյուղեր ոչնչացնել և ազգային սահմանները ջնջել:Չկա մի ժողովուրդ, որը կարող է կանգնեցնել նման պատերազմը միայն իր ջանքերով։ Մեզ անհրաժեշտ է համաշխարհային առաջնորդների մասնակցությունը»,- նշել է Զելենսկին։
Զելենսկին հիշեցրել է, որ Ուկրաինան Շվեյցարիայի հետ Խաղաղության գագաթնաժողով է նախապատրաստում, որը կսկսվի հունիսի 15-ին։ Այժմ հաստատվել է ավելի քան 80 պետության մասնակցությունը, և Ուկրաինան շարունակում է աշխատել առաջնորդների հետ՝ հրավիրելով նրանց Գագաթաժողովին։
«Ես դիմում եմ աշխարհի առաջնորդներին, որոնք դեռևս կողքից են հետևում Խաղաղության գագաթնաժողովին նախապատրաստվելու գլոբալ ջանքերին. դիմում եմ Միացյալ Նահանգների նախագահ Ջո Բայդենին, Չինաստանի ղեկավար Սի Ծինփինին: Խնդրում եմ՝ աջակցեք Խաղաղության գագաթնաժողովին ձեր անձնական առաջնորդությամբ և մասնակցությամբ»,- նշել է Զելենսկին։
Հիշեցնենք, որ երկօրյա բարձր մակարդակի գագաթնաժողովում մասնակիցներն ուղիներ են փնտրելու Ուկրաինայում խաղաղության հասնելու համար։
Նշվում է, որ ՌԴ-ն միջոցառմանը չի մասնակցելու: