ՌԴ միլիարդատերը Լյուքսեմբուրգից պահանջում է 15,8 մլրդ դոլարի փոխհատուցում
Ռուսաստանցի գործարար, երկրի ամենահարուստ մարդկանցից մեկը համարվող Միխայիլ Ֆրիդմանը ներկայացուցիչների միջոցով Լյուքսեմբուրգի կառավարությանն առաջարկել է խաղաղ բանակցություններ սկսել իր «օտարված» ակտիվների համար իրեն 15,8 միլիարդ դոլարի փոխհատուցում վճարելու վերաբերյալ։
Լյուքսեմբուրգի կողմից մերժման դեպքում միլիարդատերը մտադիր է հայց ներկայացնել միջազգային արբիտրաժում, գրում է «Վեդոմոստի»-ն՝ վկայակոչելով աղբյուրներ։
Միխայիլ Ֆրիդմանը բաժնետոմսեր ունի լյուքսեմբուրգյան ընկերություններում, այդ թվում՝ CTF Holdings-ում, ABH Holdings-ում, Alfa Asset Management-ում: Դրանց միջոցով նա ներդրումներ է կատարել Alfa Bank-ում, Amsterdam Trade Bank-ում, X5 Group-ում, Veon-ում և այլ ընկերություններում: Ֆրիդմանի ակտիվները սառեցվել են ԵՄ պատժամիջոցների շրջանակում:
Գործարարը գույքի սառեցումը համարում է ապօրինի օտարում. նա պնդում է, որ Լյուքսեմբուրգը խախտել է ներդրումների փոխադարձ պաշտպանության մասին 1989 թվականի երկակի ներդրումային պայմանագիրը։ Ըստ այդ պայմանագրի՝ ներդրողների ներդրումները չեն կարող օտարվել, բացառությամբ այն դեպքերի, երբ որոշումն ընդունված է հանրային շահերից ելնելով և խտրական չէ։ Նման դեպքում պետք է փոխհատուցում վճարվի։
Ինչպես հաղորդում է «Վեդոմոստի»-ն, Լյուքսեմբուրգի կառավարությունը վեց ամիս ժամանակ ունի պատասխանելու համար։ Դրանից հետո Միխայիլ Ֆրիդմանը իրավունք կունենա վեճը քննարկման ներկայացնել ՄԱԿ-ի միջազգային առևտրային իրավունքի հանձնաժողովին կամ Ստոկհոլմի արբիտրաժին։ Պարբերականը պարզաբանում է, որ առաջարկը Լյուքսեմբուրգի իշխանություններին ուղարկվել է փետրվարին։
Եվրամիությունը պատժամիջոցներ է կիրառել Alfa Group-ի հիմնադիրների՝ Միխայիլ Ֆրիդմանի և Պյոտր Ավենի դեմ 2022 թվականի ապրիլին։ Որոշումը բացատրվել է ՌԴ նախագահ Վլադիմիր Պուտինի հետ իրենց մտերմությամբ։ 2024 թվականի ապրիլին Լյուքսեմբուրգի առաջին ատյանի դատարանը որոշել է վերացնել գործարարների նկատմամբ անձնական պատժամիջոցները՝ դրանք համարելով անհիմն։ Սակայն ԵՄ խորհուրդը պարտավոր չէ կատարել դատարանի որոշումը։