Ինչու՞ են մեքենաներն ընկնում «Գազպրոմ Արմենիա»-ի աշխատանքների համար փորված փոսը․ քաղաքապետարանի պարզաբանումը
«Գազպրոմ Արմենիան» պատշաճ կահավորում է իրականացրել, որտեղ թե՛ ճանապարհային նշաններն են դրված, թե՛ լուսավորությունն է պատշաճ ապահովված։
Այս մասին Tert.am-ի հետ զրույցում ասաց քաղաքապետի մամուլի խոսնակ Հայկ Կոստանյանը՝ անդրադառնալով «Գազպրոմ Արմենիա»-ի աշխատանքների համար Երևանի Շիրակի փողոցում փորված փոսերի մեջ ավտոմեքենաներ ընկնելու լուրին։
«Այսինքն, այն ինչը շինթույլտվությունով քաղաքապետարանը լիազորել է, որ իրենք այդ շինթույլտվության շրջանակներում իրականացնեն իրենց աշխատանքները, նրանք այդ բոլոր կետերը պահել են՝ մասնավորապես կահավորման մասով։
Այդ երեք մեքենաների դեպքը կարելի է ասել հիմնականում վարորդների անուշադրության արդյունք է եղել, որովհետև, օրենքի տեսանկյունից, իրենց կատարած կահավորման արդյունքով բացթողում չեն իրականացրել»,- ասաց նա։
Ավելի վաղ հայտնել էինք, որ «Գազպրոմ Արմենիա»-ի աշխատանքների համար Շիրակի փողոցում փորված փոսերի մեջ ավտոմեքենաներ են ընկնում և վարորդներին պատճառվել է նյութական վնաս։