Ռեալը մտադիր է ևս 375 մլն եվրոյի վարկ վերցնել «Սանտիագո Բեռնաբեուի» վերակառուցման համար
Մադրիդի «Ռեալը» ևս մեկ վարկ կվերցնի «Սանտյագո Բեռնաբեուի» վերակառուցման համար։
Ըստ Marca-ի՝ նոր վարկի գումարը կկազմի 375 մլն եվրո, տևողությունը՝ 30 տարի՝ տարեկան 4,7%-ով։ Այդ միջոցները կուղղվեն ավտոկայանատեղերի կահավորմանը և մարզադաշտի ու հարակից տարածքների բարեկարգմանը: Լրացուցիչ ծախսերը նույնպես մասամբ պայմանավորված են գնաճով։
Հաղորդվում է, որ վերջին ֆինանսական տարվա հաշվետվությունները և ընթացիկ մրցաշրջանի բյուջեն կներկայացվեն նոյեմբերի 11-ին կայանալիք տարեկան ընդհանուր ասամբլեայում, որտեղ «Ռեալի» տնօրենների խորհուրդը կխնդրի հաստատել նոր վարկը։
«Ռեալը» նախկինում երկու անգամ վարկ էր վերցրել «Սանտյագո Բեռնաբեուի» վերակառուցման համար։ Փոխառությունների ընդհանուր գումարը կազմել է 800 մլն եվրո։ Առաջին վարկը` 575 մլն եվրո, վերցվել է ենթակառուցվածքի հետ կապված աշխատանքների ֆինանսավորման համար, երկրորդը` 225 մլն, խոտածածկի համար: