Վրաստանի ընդդիմության որոշ ներկայացուցիչներ Ռուսաստանում ապստամբության փորձի ժամանակ ծրագրում էին տանկերով մտնել Աբխազիա, Հարավային Օսիա և նույնիսկ Սոչի. իշխող կուսակցության ղեկավար
Վրաստանի ընդդիմության որոշ ներկայացուցիչներ Ռուսաստանում զինված ապստամբության փորձի ժամանակ ծրագրում էին տանկերով մտնել Աբխազիա, Հարավային Օսիա և նույնիսկ Սոչի։ Այս մասին հայտարարել է իշխող «Վրացական երազանք՝ ժողովրդավար Վրաստան» կուսակցության նախագահ Իրակլի Կոբախիձեն։
«Մենք հիշում ենք, թե ինչպես էր հավաքական Ազգային շարժումը (վրացական ընդդիմության ընդհանրացում) աջակցում Պրիգոժինին, կարգախոսներ ու բանաստեղծություններ նվիրում նրան, ինչպես էր ծրագրում Պրիգոժինի հաջողությանը զուգահեռ տանկերով մտնել ոչ միայն Աբխազիա և Ցխինվալի, այլ նաև գրավել Սոչին»,- գրել է Կոբախիձեն Facebook-ի իր էջում:
Ըստ քաղաքական գործչի՝ արձագանքելով Ռուսաստանի Դաշնությունում տեղի ունեցող իրադարձություններին՝ ընդդիմությունը ցույց տվեց, որ «օգտագործում է ցանկացած պատրվակ՝ Վրաստանում երկրորդ ճակատ բացելու համար»։
Նրա խոսքով՝ ընդդիմությունը չթաքցրեց, որ եթե համապատասխան հնարավորություններ ունենար, «կօգտագործեր Աբխազիա ու Ցխինվալի տանկերով մտնելու առաջին իսկ հնարավորությունը»։
Կուսակցության ղեկավարն ընդգծել է, որ եթե Վրաստանում «երկրորդ ճակատ» բացվեր, իրենք պետք է կռվեին նաև աբխազների ու օսերի հետ։
«Անընդունելի է, որ վրացիներն ու աբխազները, վրացիներն ու օսերը կրկին միմյանց արյուն թափեն: Սա կլինի ամենամեծ հանցագործությունն ապագա սերունդների դեմ»,- ասվում է Կոբախիձեի գրառման մեջ:
Վրաստանի իշխող կուսակցության սկզբունքային դիրքորոշումը, ըստ Կոբախիձեի, այն է, որ «Վրաստանի տարածքային ամբողջականությունը պետք է վերականգնվի միայն խաղաղ ճանապարհով»։
Վրաստանը պետք է վերադարձնի ոչ միայն տարածքները, նշել է նա, այլև վերականգնի աբխազների և օսերի վստահությունը։