ՌԴ ԱԴԾ-ն կանխել է Ղրիմի ղեկավարի դեմ մահափորձը
Ռուսաստանի Անվտանգության դաշնային ծառայությունը հայտնել է, որ կանխել է Ղրիմի ղեկավար Սերգեյ Ակսյոնովի դեմ մահափորձը։ Ձերբակալվել է Ռուսաստանի քաղաքացի, որը, ըստ ԱԴԾ-ի, հավաքագրվել է Ուկրաինայի անվտանգության ծառայության կողմից:
Ռուսական հետախուզական ծառայությունների տվյալներով՝ նա ծրագրել է պայթեցնել Սերգեյ Ակսյոնովի մեքենան, գրում է kommersant.ru-ն։
Պարզվել է, որ ձերբակալվածը ՌԴ քաղաքացի է, ծնված 1988թ.: ԱԴԾ-ն նշում է, որ նա Ուկրաինայի տարածքում հետախուզադիվերսիոն գործունեության դասընթաց է անցել։
Հրապարակված տեսանյութում տղամարդն ասում է, որ իրեն հավաքագրել են Ուկրաինայի հատուկ ծառայությունները 2022 թվականի դեկտեմբերին։
«Ես հանձնարարություն եմ ստացել գնալ Ղրիմ՝ Սիմֆերոպոլ»,- պատմել է տղամարդը։
Նրա խոսքով՝ ինքը աշխատանք է գտել քաղաքում և սպասել է հետագա հրահանգների։ Նա պետք է ականապատեր մեքենան և այն դներ Ղրիմի ղեկավարի ավտոշարասյան ճանապարհին: