Իսրայելը մեծ ռազմական գործողություն է սկսել Արևմտյան ափում. Պաղեստինը հայտնել է զոհերի և վիրավորների մասին (լուսանկարներ, տեսանյութ)
Իսրայելը երկուշաբթի վաղ առավոտյան մեծ ռազմական գործողություն է սկսել Արևմտյան ափում՝ հազարավոր զինվորներ տեղակայելով պաղեստինյան տարածքում և անօդաչու թռչող սարքերով հարվածելով Ջենին քաղաքին և շրջակայքում գտնվող զինյալների հենակետերին:
Այս մասին գրում է Daily Mail-ը՝ նկատելով, որ ներխուժումն ավելի է սաստկացրել իսրայելապաղեստինյան լարվածությունը:
Պաղեստինի առողջապահության ոլորտի պաշտոնյաները հայտնել են, որ առնվազն չորս պաղեստինցի է զոհվել անօդաչու թռչող սարքի հարվածների հետևանքով, բացի այդ կա քսանից ավելի վիրավոր: Պաղեստինյան լրատվամիջոցները հաղորդում են, որ իսրայելական ռազմական գործողության հետևանքով բազմաթիվ բնակիչների տներում էլեկտրաէներգիան անջատվել է:
Պարբերականը նկատում է, որ այս զարգացումները տեղի են ունենում Իսրայելում աճող ներքին ճնշման ֆոնին. մարդիկ իշխանություններից պահանջում են կոշտ պատասխան տալ իսրայելցի վերաբնակիչների վրա մի շարք հարձակումներին, ներառյալ անցյալ շաբաթ հրաձգությունը, որի հետևանքով զոհվել էր չորս մարդ:
Իսրայելի բանակի խոսնակ, փոխգնդապետ Ռիչարդ Հեխտը հայտնել է, որ ռազմական գործողությունը սկսվել է գիշերը ժամը 1-ից հետո՝ ավիահարվածով շենքին, որն օգտագործվում էր գրոհայինների կողմից հարձակումներ ծրագրելու համար: Նա ասել է, որ գործողության նպատակը զենքի ոչնչացումն ու առգրավումն է։
«Մենք չենք ծրագրում դիրքեր գրավել: Մենք գործում ենք կոնկրետ թիրախների դեմ», - ասել է զինվորականը։
Նա նշել է, որ գործողությանը մասնակցում է 2000 զինվոր, և որ ռազմական անօդաչու թռչող սարքերը մի շարք հարվածներ են հասցրել ցամաքային ուժերի համար ճանապարհը մաքրելու համար։
Թեև Իսրայելը վերջին շաբաթներին առանձին ավիահարվածներ է հասցրել Հորդանան գետի Արևմտյան ափին, Հեխտը ասել է, որ երկուշաբթի օրվա հարվածների շարքը նշանավորել է 2006 թվականից ի վեր խոշորագույն լարվածությունը: