ԼՂ շրջափակմանը վերջ տալու ուղղությամբ պատասխանատվություն ստանձնելու կոչ կուղղեմ Էրդողանին. Կարո Փայլան
Ավելի ան երկու շաբաթ է, որ Լաչինի միջանցքը, որ Լեռնային Ղարաբաղը Հայաստանին միացնող հաղորդակցության միակ ճանապարհն է, իրենք զիրենց «բնապահպան» համարող մի խումբ ադրբեջանցիների և Ադրբեջանի պաշտոնյաների կողմից փակ է պահվում։ Այս մասին ֆեյսբուքյան իր էջում գրել է Թուրքիայի խորհրդարանի հայազգի պատգամավոր Կարո Փայլանը:
«Լաչինի միջանցքի փակ լինելու հետևանքով Լեռնային Ղարաբաղում սննդի, դեղի հիմնական կարիքները ապահովելու տագնապը հետզհետե աճում է։ Լեռնային Ղարաբաղի 120 հազար հայ բնակչութունը շրջափակման տակ է։ Մարդկային տագնապի վերածվող այս շրջափակմանը ժամ առաջ պետք է վերջ տրվի:
Թուրքիան չպիտի անտարբեր մնա Լեռնային Ղարաբաղի հետզհետե աճող այս մարդկային տագնապի հանդեպ։ Քաղաքական ուժերը անհապաղ գործողություն պէտք է ձեռնարկեն։
Լեռնային Ղարաբաղի շրջափակմանը վերջ տալու ուղղությամբ պատասխանատվություն ստանձնելու կոչ կուղղեմ նախագահ Էրդողանին։
Կովկասի մէջ խաղաղության հաստատումը Թուրքիայի օգտին է։ Եթե Լեռնային Ղարաբաղում մարդկային տագնապին վերջ տալու համար բոլորս պատասխանատվություն ստանձնենք՝ թէ՛ Հայաստան-Ադրբեջան խաղաղության գործընթացում և թէ Հայաստան-Թուրքիա կարգավորման գործընթացում կկարողանանք վերադառնալ դրական օրակարգի»,- գրել է նա: